ភ្នំពេញ៖ លោក Chen Bo អគ្គនាយករងនៃក្រុមហ៊ុន Guangxi Luobawang Technology Co., Ltd. ដែលផលិត និងចែកចាយមីជូរហឹរដ៏ធំមួយនៅ ទីក្រុងលីវចូវ ខេត្តគ័ងស៊ី ប្រទេសចិន បាននិយាថា បច្ចុប្បន្ននេះ ក្រុមហ៊ុន កំពុង ផ្តល់ការងារ និងប្រាក់ចំណូលដល់ប្រជាពលរដ្ឋចំនួនប្រមាណ ៣ម៉ឺននាក់ តាមរយៈការធ្វើកិច្ចសន្យា ទទួលទិញ​ផលិតផលកសិផល ដែលជាវត្ថុធាតុដើមក្នុងការផលិតមីជូរហឹរ។

នៅក្នុងដំណើរទស្សនកិច្ចរបស់ក្រុមអ្នកសារព័ត៌មានកម្ពុជា នៅក្នុងប្រទេសចិន លោក Chen Bo បានរៀបរាប់​ឲ្យដឹងថា មកដល់ពេលនេះ ក្រុមហ៊ុនខ្លួនបានបើកដំណើរការរយៈពេល ៨ឆ្នាំហើយ ដោយការផ្តោតសំខាន់​លើការផលិត និងកែច្នៃ មីជូរហឹរ។ បច្ចុប្បន្ន មីជូរហឹរ មាន៥រសជាតិ ដូចជា រសជាតិដើម, ប៉េងប៉ោះ, ឆ្អឹងស៊ុប, ថែមហឹរ និងរសជាតិថែម(ក្អិន)ស្អុយ។

លោកបានឲ្យដឹងទៀតថា ពីមួយឆ្នាំទៅមួយឆ្នាំ បរិមាណផលិតមីគឺកើនឡើង ២ខ្ទង់ ខណៈបរិមាណផលិត​ក្នុង​ឆ្នាំ២០២២ មានចំនួន ១០០លានកញ្ចប់។ នៅឆ្នាំ២០២៣នេះ លោកក៏មានសុទិដ្ឋិនិយមចំពោះកំណើនផលិតកម្ម នៅក្នុងក្រុមហ៊ុនរបស់ខ្លួនដែរ ដោយសារប្រជាប្រិយភាព និងការនិយមចូលចិត្តរបស់អតិថិជន ទាំងក្រុងប្រទេសចិន និងក្រៅប្រទេស។ លោកបន្ថែមថា ក្រៅពីលក់នៅប្រទេសចិន យីហោមីជូរហឹររបស់លោក ក៏ត្រូវបានចែកចាយ​នៅក្រៅប្រទេសដែរ ដូចជា ទីផ្សារអាម៉េរិក ទីផ្សារនៅតំបន់អាស៊ី សិង្ហបុរី ម៉ាឡេស៊ី។ ក្រៅពីនេះ ប្រទេសកម្ពុជា ក៏មានវត្តមានមីជូរហឹររបស់ក្រុមហ៊ុននេះដែរ។

លោកឲ្យដឹងទៀតថា បច្ចុប្បន្ន តាមរយៈឈ្មួញចែកចាយ ផលិតផលមីជូរហឹរត្រូវបាននាំចូលទៅប្រទេសកម្ពុជាហើយ ដោយសារតែតំបន់នេះនៅជិតនឹងប្រទេសកម្ពុជា។ ដូច្នេះការដឹកជញ្ជូនមានភាពងាយស្រួលផងដែរ។ ហើយតាមរយៈបុគ្គលិកទីផ្សាររបស់ក្រុមហ៊ុន ដោយសារតែរសជាតិរបស់ប្រជាពលរដ្ឋតំបន់លីវចូវ និងរសជាតិនៅ​កម្ពុជា ស្រដៀងគ្នា។ ដូច្នេះនៅកម្ពុជាក៏លក់ដាច់ដែរ ហើយរសជាតិដែលដាច់ជាងគេ គឺ(មីជូរហឹរ)រសជាតិដើម»។

សូមបញ្ជាក់ថា អ្នកសារព័ត៌មានកម្ពុជាចំនួន១៤រូប មកពីស្ថាប័នធំៗចំនួន១០ ត្រូវបានកាសែត The Commercial News និង Cambodia Guangxi Cloud ASEAN International Communication Station ដែលជាអង្គភាពចំណុះ Guangxi Daily អញ្ញើញឲ្យទស្សនកិច្ច រយៈពេល៦ថ្ងៃ ចាប់ពីថ្ងៃទី១៥ ដល់២០ ខែមិថុនា ឆ្នាំ២០២៣ នៅក្នុងតំបន់សំខាន់ៗរបស់​ខេត្តក្វាងស៊ី ដូចជា ទីក្រុងណាននី (Nanning) ទីក្រុងឈីងចូង (Qinzhou) ទីក្រុងលីវចូង (Liuzhou) ទីក្រុងគួយលីន (Guilin) និងកន្លែងដ៏ស្រស់ស្អាតផ្សេងៗទៀត៕ ដោយ ៖ បូរ៉ាវី