ភ្នំពេញ ៖ អគ្គលេខាធិការដ្ឋានគណៈចលនាមហាជននៃគណៈកម្មាធិការកណ្ដាលគណបក្សប្រជាជនកម្ពុជា នៅ​រសៀលថ្ងៃទី២៦ ខែមិថុនានេះ បានរៀបចំពិធីសំណេះសំណាលជាមួយសមាជិក-សមាជិកា​គណបក្ស​ប្រជាជនកម្ពុជា នៃក្រុមការងាររួមគ្នាដើម្បីអភិវឌ្ឍន៍កម្ពុជា ក្រោមអធិបតីភាពសម្ដេចកិត្តិសង្គហបណ្ឌិត ម៉ែន សំអន អនុប្រធាន​គណបក្ស​ប្រជាជនកម្ពុជា និងជាប្រធានគណៈចលនាមហាជន ឯកឧត្តម ហ៊ុន ម៉ានី អគ្គលេខាធិការ​នៃ​អគ្គលេខាធិការ​ដ្ឋានគណៈចលនាមហាជន រួមទាំងថ្នាក់ដឹកនាំសមាជិក-សមាជិកា គណបក្សប្រជាជន​កម្ពុជាប្រមាណ៣៦០០ រូប ស្ថិតនៅវិមាន៧មករា។

នៅក្នុងពិធីសំណាលនោះ សម្ដេចកិត្តិសង្គហបណ្ឌិត ម៉ែន សំអន បានថ្លែងថា ការជួបជុំនាពេលនេះ បាន​បង្ហាញ​ពីកម្លាំងរឹងមាំរបស់គណបក្សប្រជាជនកម្ពុជាក្នុងវិស័យសេដ្ឋកិច្ចក្រៅប្រព័ន្ធក្នុងរាជធានីភ្នំពេញ ដែលបានចងក្រង ពង្រឹង ពង្រីក រចនាសម្ព័ន្ធសមាជិក-សមាជិកា របស់ខ្លួនរហូតមានសមាជិកសរុបចំនួនជាង១២,០០០ នាក់។

សម្ដេចកិត្តិសង្គហបណ្ឌិត បានរំលឹកអំពីប្រវត្តិសមិទ្ធផល និង ស្នាដៃរបស់គណបក្សប្រជាជនកម្ពុជា ផ្ដើមចេញ​ពីការរំដោះជាតិ បញ្ចប់សង្រ្គាម និងស្វែងរកសុខសន្តិភាពរហូតដល់ការកសាង និងអភិវឌ្ឍន៍ប្រទេស ពីមួយ​ដំណាក់កាលទៅមួយដំណាក់កាល ជាពិសេសក្នុងដំណាក់កាលចុងក្រោយ​នៃការគ្រប់គ្រងការរីករាល​ដាល​ជំងឺកូវីដ-១៩ និងភាពជោគជ័យក្នុងនាមជាម្ចាស់ផ្ទះព្រឹត្តិការណ៍ថ្នាក់តំបន់ និង អន្តរជាតិនានា។

លើសពីនេះ សម្ដេចកិត្តិសង្គហបណ្ឌិតបានអំពាវនាវដល់សមាជិក-សមាជិកាទាំងអស់ ត្រៀមខ្លួន​ចូលរួម​បោះឆ្នោតនៅថ្ងៃទី២៣ខែកក្កដាខាងមុខឱ្យបានគ្រប់ៗគ្នា ដោយបោះឆ្នោតជូន គណបក្សប្រជាជនកម្ពុជា ដើម្បីបន្តដឹកនាំប្រទេសជាតិ ឱ្យបានកាន់តែរីកចម្រើន។

ជាមួយគ្នានេះ ឯកឧត្តម ហ៊ុន ម៉ានី អគ្គលេខាធិការនៃអគ្គលេខាធិការដ្ឋានគណៈចលនាមហាជន បានថ្លែងអំណរ​គុណចំពោះវត្តមានយ៉ាងកក់ក្ដៅរបស់សម្ដេចកត្តិសង្គហបណ្ឌិត ដែលបានអញ្ជើញជាអធិបតី​ក្នុងពិធីដ៏មាន​សារៈសំខាន់ ព្រមទាំងសម្ដែងនូវការកោតសរសើរ និងវាយតម្លៃខ្ពស់ចំពោះលទ្ធផលនិងស្នាដៃការងារនានារបស់ ក្រុមការងាររួមគ្នាដើម្បីអភិវឌ្ឍន៍កម្ពុជា ដែលបានរួមចំណែកជាមួយគណបក្ស ចាប់តាំងពីពេលបង្កើតនៅឆ្នាំ២០១១ រហូតមកទល់ពេលនេះ។   

លើសពីនេះ ឯកឧត្តម ហ៊ុន ម៉ានី បានគូសបញ្ជាក់ពីការយកចិត្តទុកដាក់ខ្ពស់របស់រាជរដ្ឋាភិបាល​ដែលដឹកនាំ​ដោយគណបក្សប្រជាជនកម្ពុជា ទាំងផ្នែកសេដ្ឋកិច្ចក្នុងប្រព័ន្ធ និងផ្នែកសេដ្ឋកិច្ចក្រៅប្រព័ន្ធ ដើម្បីលើកកម្ពស់​សុខុមាល​ភាព សម្រួលការលំបាក ដោះស្រាយបញ្ហាប្រឈម និងកែលម្អជីវភាពរស់នៅ។

គួរបញ្ជាក់ដែរថា ពិធីសំណេះសំណាលជាមួយសមាជិក-សមាជិកា គណបក្សប្រជាជនកម្ពុជា នៃក្រុមការងារ​រួមគ្នាដើម្បីអភិវឌ្ឍន៍កម្ពុជា គឺរៀបចំធ្វើឡើងស្របតាមស្មារតីរបស់មហាសន្និបាតវិសាមញ្ញទូទាំង​ប្រទេស​របស់គណបក្សប្រជាជនកម្ពុជា នាថ្ងៃទី២៨-២៩ មករា ឆ្នាំ២០២៣៕ អត្ថបទ៖ទូច សោភ័ណ​