ភ្នំពេញ៖ ក្នុងដំណើរទស្សនកិច្ចរបស់ក្រុមអ្នកសារព័ត៌មានកម្ពុជានៅប្រទេសចិន ក្រុមហ៊ុនផលិតថ្នាំ អាហារបំប៉ន​សុខភាព​ធំមួយនៅខេត្តគ័ងស៊ី បានប្រាប់ឲ្យដឹងថា ក្រុមហ៊ុនកំពុងស្វែងរកឱកាសពង្រីកការចែកចាយផលិតផលឱសថ ស្ករបៀមសម្រួលបំពង់ក និងប្រភេទថ្នាំបំប៉នសុខភាពផ្សេងៗទៀតរបស់ខ្លួននៅក្នុងប្រទេសកម្ពុជា។

លោក ហ៊ង ចៀន ភីង (Huang Jian Ping) អគ្គនាយករងក្រុមហ៊ុន ជីង សាងជឺ ក្នុងឱកាសទទួលស្វាគមន៍​ក្រុមអ្នក​សារព័ត៌មានកម្ពុជា កាលពីកន្លងទៅនេះ បានឲ្យដឹង គិតមកដល់ពេលនេះ ក្រុមហ៊ុនលោកដំណើរ​ការអស់រយៈ​ពេលប្រមាណ ៨០ឆ្នាំមកហើយ ហើយបច្ចុប្បន្នបានវិវត្តខ្លួនជាក្រុមហ៊ុនផលិតថ្នាំដែលឈរនៅលំដាប់លេខ៥០ នៅក្នុងប្រទេសចិន។ ក្រុមហ៊ុននេះ ផ្តោតលើការផលិតថ្នាំស្កបៀម និងអាហារបំប៉នសុខភាព ហើយបច្ចុប្បន្នក្រុម​ហ៊ុនមានផលិតឱសថ ស្ករបៀម និងអាហារបំប៉នសុខភាពចំនួន ៣៦៨ប្រភេទ។ លោកបានបន្តថា ផលិតផលរបស់​ក្រុមហ៊ុន កំពុងត្រូវបានចែកចាយទាំងក្នុងប្រទេស និងទៅប្រទេសចំនួន ៥៣ទៀតនៅទូទាំងពិភពលោក ក្នុងនោះមាន សហរដ្ឋអាម៉េរិក តំបន់អឺរ៉ុប រុស្ស៊ី ជប៉ុន សិង្ហបុរី ថៃ និងក្នុងប្រទេសកម្ពុជាផងដែរ។

លោកបានលើកឡើងថា ទីផ្សារកម្ពុជា គឺជាទីផ្សារសំខាន់មួយក្នុងតំបន់អាស៊ាន។ ដូច្នេះក្រុមហ៊ុន បាននិងជំរុញឱ្យ​ផលិតផល​របស់ក្រុមហ៊ុន ត្រូវបានចែកចាយលក់នៅទូទាំងប្រទេសកម្ពុជា។ លោកឲ្យដឹងទៀតថា ដោយសារតែ​ផលិតផល មានលក់នៅច្រើនប្រទេស ដូច្នេះក្រុមហ៊ុន នឹងបន្តកែច្នៃប្រភេទថ្នាំ និងអាហារសុខភាព តាមតម្រូវការ​របស់ប្រជាជន​តាមប្រទេសនីមួយៗ ដោយឈរលើស្មារតីយកចិត្តទុកដាក់លើសុខភាពប្រជាជនជាធំ.

សូមបញ្ជាក់​ថា អ្នកសារព័ត៌មានកម្ពុជាចំនួន១៤រូប មកពីស្ថាប័នធំៗចំនួន១០ កាលពីថ្ងៃទី១៥ ដល់២០ ខែមិថុនា ឆ្នាំ២០២៣​កន្លងទៅ ត្រូវបានកាសែត The Commercial News និង Cambodia Guangxi Cloud ASEAN International Communication Station ដែលជាអង្គភាពចំណុះ Guangxi Daily អញ្ញើញឲ្យទស្សនកិច្ច ក្នុងកម្មវិធី «អ្នកសារព័ត៌មានកម្ពុជា មើលខេត្តគ័ងស៊ី»៕ ដោយ ៖ បូរ៉ាវី