ខ្សែរថភ្លើងក្រោមដី Al Mashaaer Al Mugaddassah ដែលដឹកជញ្ជូនក្រុមធម្មយាត្រារនៅតាមទីកន្លែងពិសិដ្ឋអំឡុងរដូវបុណ្យហាជិនោះ បានចាប់ផ្តើមប្រតិបត្តិការ​ហើយកាល​ពីថ្ងៃ​អាទិត្យ។

ផ្លូវដែកដែលជាមធ្យោបាយកាត់បន្ថយការកកស្ទះចរាចរណ៍តាមផ្លូវធ្វើធម្មយាត្រានោះ នឹងដឹកជញ្ជូនក្រុមធម្មយាត្រាទៅកាន់ទីកន្លែងពិសិដ្ឋនៅក្រៅទីក្រុង Mecca ដើម្បីធ្វើពិធីសាសនា ដូចជាការចោលដុំថ្មលើអារក្សជាដើម។

យោងតាមសម្តីរបស់លោក Wael Sufta គឺជាប្រធានផ្នែកស្ថានីយ៍នៃគម្រោងរថភ្លើងក្រោមដី Al Mashaeer Al Mugaddassahបានឲ្យដឹងថា រថភ្លើងក្រោមដីនេះ ត្រូវបានរៀបចំឡើង ដើម្បី​ដឹកជញ្ជូនអ្នកដំណើរប្រហែល ៣៦ម៉ឺននាក់ ក្នុងរយៈពេលតិចជាង ៦ម៉ោង ចេញពីតំបន់ភ្នំ Arafat ទៅកាន់តំបន់ Muzdalifa ដោយវាមានសមត្ថភាពដឹកអ្នកដំណើរ ៧២.០០០នាក់ ក្នុង ១ជើង ក្នុងរយៈពេល ១ម៉ោង។

អារ៉ាប៊ីសាអូឌីត នឹងរៀបចំទទួលក្រុមអ្នកធម្មយាត្រាប្រហែល ២.៦លាននាក់ សម្រាប់រដូវបុណ្យាហាជិឆ្នាំ២០២៣នេះ ក្រោយពួកគេ ដកចេញវិធានការរឹតត្បិតជំងឺ COVID-19ជាលើក​ដំបូង ចាប់តាំងពីឆ្នាំ២០១៩ រហូតមក៕