ទីក្រុង​ម៉ូស្គូ​របស់​រុស្ស៊ី ហាក់ដូចជា​ស្ងាត់ជ្រងំ​កាលពី​ថ្ងៃអាទិត្យ ក្នុងនោះ​ទីលាន​ចតុរង្គ​ក្រហម បាន​បិទទ្វារ ប៉ុន្តែ​ក្រៅពីនោះ មាន​ភស្តុតាង​តិចតួច​ពី​សន្តិសុខ​កើនឡើង ។ ទាហាន​​​ស៊ី​ឈ្នួល​​រុស្ស៊ី Wagner​បាន​ដកទ័ព​ចេញពី​ទីក្រុង​ភាគខាងត្បូង Rostov របស់​រុស្ស៊ី​កាលពី​យប់​កន្លងទៅ ក្រោម​កិច្ចព្រមព្រៀង​ដែល​បាន​លុប​ចោលការ​ប្រឈម​ពុំ​ធ្លាប់​ដែលមាន​ពីមុនមក​ចំពោះ​អំណាច​របស់លោក​ប្រធានាធិបតី Vladimir Putin និង​បញ្ឈប់​ការមកដល់​រហ័ស​រប​ស់​ពួកគេ​នៅ​ទីក្រុង​ម៉ូស្គូ។

ក្រុម​សកម្មប្រយុទ្ធ​របស់​ទាហាន​ស៊ី​ឈ្នូ​ល Wagner បាន​វិលត្រឡប់​ទៅកាន់​មូលដ្ឋានទ័ព​របស់​ពួកគេ ជា​ថ្នូរ​នឹង​ការធានា​សុវត្ថិភាព​របស់​ពួកគេ ហើយ​មេដឹកនាំ​លោក Yevgeny Prigozhin នឹងធ្វើ​ដំណើរ​ទៅកាន់​ប្រទេស​បេឡា​រុស ។ នេះ​បើ​យោងតាម​សេចក្តី​ព្រមព្រៀង​សម្របសម្រួល​ដោយ​ប្រធានាធិបតី​បេឡា​រុស​លោក Alexander Lukashenko។ នៅ​ថ្ងៃ​ដ៏​កក់ក្តៅ​ក្នុង​រដ្ឋធានី​ប្រទេស​រុស្ស៊ី​មួយ​នេះ ប្រជាពលរដ្ឋ​បានចេញ​ក្រៅ​អាំង​កម្តៅថ្ងៃ ពេលដែល​ពួកគេ​ឆ្លុះបញ្ចាំង​ពី​ហេតុការណ៍​កាលពី​រយៈពេល​១​ថ្ងៃមុន។

លោក Oleg គឺជា​ពលរដ្ឋ​មួយរូប​រស់នៅក្នុង​ទីក្រុង​ម៉ូស្គូ និយាយប្រាប់​ទីភ្នាក់ងារ​ព័ត៌មាន​រ៉​យ​ទ័​រថា លោក​ពុំបាន​តក់ស្លុត​នោះទេ លោក​នឹងមិន​ទៅ​ទីណា​ផ្សេងទៀត​នោះទេ មិត្ត​ភ័ក្តិ​របស់លោក​ក៏​ដូចគ្នា​ដែរ។

​លោក​បន្តថា មាននូវ​ការខ្វែងគំនិត​គ្នា​ចំពោះ​ការសម្រេចចិត្ត​ដែល​បានធ្វើ​ឡើង ឧទាហរណ៍​ដូចជា​ការបិទ​ទីក្រុង ប្រហែល​ពួកគេ​មិនគួរ​បង្ក​ផលវិបាក​បែបនេះ​ឲ្យ​មនុស្ស​ជាច្រើន​ដោះស្រាយ​បញ្ហា​នោះឡើយ។

លោក Andrey គឺជា​ពលរដ្ឋ​មួយរូប​ទៀត និយាយថា លោក​មាន​អារម្មណ៍​មិន​ស្រួល​នោះទេ ពេលដែល​ហេតុការណ៍​ត្រូវបាន​លាតត្រដាង​ឲ្យ​ដឹង​កាលពី​ថ្ងៃទី ២៤ ខែមិថុនា ។ ម្សិលមិញ​ពិតជា​មិន​ស្រួល​ទាល់តែសោះ ប៉ុន្តែ​ក្រឡេកមើល​ថ្ងៃអាទិត្យ​នេះ មនុស្ស​ដើរហើរ​ដូច​ធម្មតា​នៅតាម​ដងផ្លូវ អ្វីៗ​គ្រប់បែបយ៉ាង​នៅ​ល្អ​ដូច​មុន​ដដែល ។ ពួកយើង​សង្ឃឹមថា អ្វីៗ​នឹង​សុខសាន្ត​នៅក្នុង​ទីក្រុង នៅក្នុង​ប្រទេស និង​នៅលើ​ពិភពលោក​ផងដែរ ។ ពួកយើង​សង្ឃឹមថា អ្វីៗ​នឹង​អាច​ដោះ​ស្រោ​យ​តាម​សន្តិវិធី ៕​