ភ្នំពេញ៖ តាមរយៈការរៀបចំរបស់ Guangxi Daily ក្រុមអ្នកសារព័ត៌មានកម្ពុជា មកពីស្ថាប័នធំៗចំនួន១០ បានចុះ សិក្សា ស្វែងយល់នៅក្នុងមហាវិទ្យាល័យបណ្តុះបណ្តាលវិជ្ជាជីវៈលីវចូវ (Liuzhou) ដែលមានអាយុកាល ៨០ឆ្នាំ ដោយ គ្រប ដណ្តប់លើផ្ទៃដី ៦៧ហិកតា ស្ថិតនៅទីក្រុងលីវចូវ ខេត្តគ័ងស៊ី ប្រទេសចិន។

បច្ចុប្បន្នមហាវិទ្យាល័យនេះ មាននិស្សិតកំពុងសិក្សាពេញម៉ោងចំនួនជិត ២១ ០០០នាក់ និងនិស្សិតអន្តរជាតិប្រហែល ២០០នាក់។ មហាវិទ្យាល័យនេះបណ្តុះបណ្តាលជំនាញ ដូចជា៖ មេកាត្រូនិច ការផលិតនិងជួសជុលយានយន្ត ស្ថាបត្យកម្ម ការរចនាសិល្បៈ សំណង់ និងស្ថាបត្យកម្មនិងឌីហ្សាញការគ្រប់គ្រងពាណិជ្ជកម្ម។ល។ ដោយឡែក កម្មវិធីសិក្សា រួមមាន៖ ថ្នាក់បរិញ្ញាបត្រ, ថ្នាក់សិក្សាមហាវិទ្យាល័យ, ថ្នាក់អនុវិទ្យាល័យបច្ចេកទេស និងមហាវិទ្យាល័យស្របគ្នា, ការបណ្ដុះបណ្ដាលវិជ្ជាជីវៈ, កម្មវិធីសិក្សា និងទេសចរណ៍រយៈពេលខ្លី, ជំរុំរដូវក្តៅអន្តរជាតិ និង កម្មវិធីភាសាចិន និងតេស្តសមត្ថភាពភាសាចិន ជាដើម។

 បច្ចុប្បន្នសាកលវិទ្យាល័យនេះ បានបើកកិច្ចសហប្រតិបត្តិការជាមួយបណ្ដាប្រទេសនៅក្នុងតំបន់អាស៊ានមួយចំនួន ដូចជាប្រទេសប្រទេសឥណ្ឌូនេស៊ី ឡាវ វៀតណាម និងប្រទេសថៃជាដើម តែជាមួយកម្ពុជាមិនទាន់មានទេ ដោយរំពឹងថា នឹងមាននាពេលអនាគត។ កិច្ចសហប្រតិបត្តិការនោះមានការបណ្ដុះបណ្ដាលទៅលើជំនាញផលិតរថយន្ដ ជួសជុលរថយន្ដ ជួសជុលសំណង់បុរាណ ។មហាវិទ្យាល័យលីវចូវ ក៏មានបំណងសហការជាមួយកម្ពុជា និងរកចំណុច ណាមួយដែលកម្ពុជាត្រូវការ ហើយបង្កើតកិច្ចសហប្រតិបត្តការរួមគ្នាផងដែរ។

សូមបញ្ជាក់ថា អ្នកសារព័ត៌មានកម្ពុជា ចំនួន១០ស្ថាប័នធំៗ ដែលត្រូវបានអញ្ញើញឲ្យទស្សនកិច្ចនៅប្រទេសចិន ចាប់ពីថ្ងៃទី១៥ ដល់ទី២០ ខែមិថុនា ឆ្នាំ២០២៣ រួមមាន ទូរទស្សន៍ព័ត៌មាន ប៊ីធីវី (BTV), កាសែតនគរវត្ត, កាសែត The Commercial News, ស៊ីស៊ី ថាមស៍ចិន–ខ្មែរ, កម្ពុជាថ្មី, FRESH NEWS, រស្មីកម្ពុជា, ថ្មី ថ្មី, Khmer Times និង សារព័ត៌មានចិន ជាវហ្វា៕ ដោយ ៖ បូរ៉ាវី