នាយករដ្ឋមន្ត្រីប៉ូឡូញ លោក Mateusz Morawiecki បានទៅសួរសុខទុក្ខទាហាន និងឆ្មាំយាមព្រំដែន នៅព្រំដែនភាគខាងកើតជាមួយប្រទេសបេឡារុស កាលពីថ្ងៃអាទិត្យ (ទី២៥ ខែមិថុនា) ពោល គឺមួយថ្ងៃបន្ទាប់ពីការបះបោរដែលមិនកើតជារូបរាងពីសំណាក់ក្រុមទាហានស៊ីឈ្នួល Wagner របស់ប្រទេសរុស្ស៊ី និងការប្រកាសថា មេបញ្ជាការរបស់ក្រុម Wagner លោក Yevgeny Prigozhin ត្រូវផ្លាស់ទៅប្រទេសបេឡារុស។

ដោយនិយាយនៅក្បែររបងព្រំដែននៅក្រុង Krynki ដែលបានសាងសង់កាលពីឆ្នាំមុន នៅតាមព្រំដែនជាមួយប្រទេសបេឡារុស ដើម្បីទប់ស្កាត់លំហូរនៃជនអន្តោប្រវេសន៍ខុសច្បាប់ លោក Morawiecki បាននិយាយថា ទាំងមេដឹកនាំបេឡារុស និងទាំងមេដឹកនាំរុស្ស៊ីអាចធ្វើរឿងចម្លែកបាន ហើយប្រទេសប៉ូឡូញ បានមើលឃើញពីសកម្មភាពចម្លែកបែបនេះ ក្នុងឆ្នាំ២០២១។

នៅចុងឆ្នាំ២០២១ ប្រធានាធិបតីបេឡារុស លោក Alexander Lukashenko ត្រូវបានសហភាពអឺរ៉ុបចោទប្រកាន់ថា បានបង្កើតឲ្យមាននូវលំហូរនៃជនអន្តោប្រវេសន៍ ដើម្បីដាក់សម្ពាធឲ្យមានការដកទណ្ឌកម្ម ដែលដាក់លើរដ្ឋាភិបាលរបស់លោក។ មនុស្សជិត ៤០.០០០នាក់ មកពីមជ្ឈិមបូព៌ា អាហ្វហ្គានីស្ថាន និងអាហ្រ្វិក បានព្យាយាមឆ្លងកាត់ព្រំដែន ដោយខុសច្បាប់ពីប្រទេសបេឡារុស។

ជាមួយគ្នានេះ លោក Morawiecki ក៏បាននិយាយផងដែរថា ប្រទេសប៉ូឡូញមានសុវត្ថិភាពជាង ក្នុងនាមជាសមាជិកនៃសម្ព័ន្ធភាពយោធាណាតូ (NATO)៕