ភ្នំពេញ ៖ ឯកអគ្គរដ្ឋទូតសហព័ន្ធរុស្ស៊ីប្រចាំនៅកម្ពុជាបានអះអាងថា ទំនាក់ទំនងការទូតរវាងប្រទេសកម្ពុជា និងប្រទេសរុស្ស៊ីរយៈពេល៦៥ឆ្នាំមកនេះ ប្រជាជន និងប្រទេសកម្ពុជាបានទទួលផលប្រយោជន៍ជាច្រើនពីប្រទេសមហាអំណាចមួយនេះ ជាពិសេសជំនាញផ្នែកវិស័យអប់រំ សុខាភិបាល ផ្នែកកសិកម្ម និងវិស័យសន្តិសុខជាដើម។

 ថ្លែងក្នុងសារពិសេសមួយតាមរយៈធ្វីតធើ ស្តីពីខួប៦៥ឆ្នាំនៃទំនាក់ទំងទ្វេភាគីរវាងកម្ពុជា-រុស្ស៊ី (១៣ឧសភា១៩៦៥-១៣ឧសភា ២០២១) លោកអាណាតូលី បូរ៉ូវីក(Anatoly Borovik) បានលើកឡើងថា ព្រឹត្តិការណ៍សំខាន់ៗរវាងកម្ពុជា និងប្រទេសរុស្ស៊ី ដែលបានបន្សល់ទុកជាបណ្ណសារ ហើយមានលក្ខណៈពិសេសផ្សេងៗទៀត ដែលប្រទេសរុស្ស៊ីបានជួយដល់កម្ពុជា ក្រោយរបបប្រល័យពូជសាសន៍ប៉ុល ពត ដូចជាផ្នែកមនុស្សធម៌ ក្នុងអំឡុងពេលទស្សវត្តន៍ឆ្នាំ១៩៦០ ដោយរុស្ស៊ីបានជួយកសាងមន្ទីរពេទ្យ ខ្មែរ-សូវៀត និងសាលាបច្ចេកទេសខ្ពស់ផ្សេងទៀតនៅក្នុងរាជធានីភ្នំពេញនោះ។

​

 ជាមួយគ្នានោះដែរ លោក អាណាតូលី បូរ៉ូវីក ក៏បានថ្លែងផងដែរថា នៅក្នុងមន្ទីរពេទ្យ និងសាលាបច្ចេកទេសដែលរដ្ឋាភិបាលរុស្ស៊ីបានសាងសង់ជូនដល់កម្ពុជានោះ ក៏មាន វេជ្ជបណ្ឌិត និងគ្រូបង្រៀនសូវៀតជាច្រើនបានធ្វើការប្រកបដោយជោគជ័យអស់រយៈពេលជាច្រើនឆ្នាំ ហើយដំណាក់កាលថ្មីនៃទំនាក់ទំនងបានចាប់ផ្តើមបន្ទាប់ពីការដួលរំលំនៃរបបប៉ុល ពត ពេលប្រទេសរុស្ស៊ីបានផ្តល់ជំនួយគ្រប់បែបយ៉ាងដល់សាធារណៈរដ្ឋប្រជាមានិតកម្ពុជាដែលកំពុងជួបការលំបាកក្នុងការស្តារខ្លួនឯងឡើងវិញនោះ។

 បើតាមការលើកឡើងរបស់អនុរដ្ឋមន្រ្តីនៃសហព័ន្ធរុស្ស៊ីលោក Igor_Morgulov បានថ្ថែងថា នៅក្នុងខួបអនុស្សាវរីយ៍រយៈពេល៦៥ឆ្នាំ នៃទំនាក់ទំនងកម្ពុជា-រុស្ស៊ីនេះដែរ ប្រមុខការទូតកម្ពុជា និងរុស្ស៊ី ក៏បានផ្ញើរអប់អរសាទរគ្នាទៅវិញទៅមកផងដែរ ដោយក្នុងសារទាំងនោះភាគីទាំងពីរបានសន្យាបន្តពង្រឹងកិច្ចសហប្រតិបត្តិការណ៍ទ្វេភាគីនៃប្រទេសទាំងពីរឲ្យកាន់តែល្អប្រសើបន្ថែមទៀតទាំងពាណិជ្ជកម្ម និងវិនិយោគ។

 លោក Igor_Morgulov បានបញ្ជាក់ទៀតថាប្រទេសទាំងពីរ(កម្ពុជា-រុស្ស៊ី)ក៏បានធ្វើការតាំងពិពណ៌តាមរយៈប្រព័ន្ធអនឡាញ ដោយមានឯកសារ និងរូបថតជាច្រើន ដែលក្នុងការតាំងពិពណ៌នោះភាគច្រើននិយាយ អំពីការផ្តល់ជំនួយសេដ្ឋកិច្ច និងបច្ចេកទេសជាអាទិភាពដល់កម្ពុជា ជាពិសេសការលើកឡើងអំពីមន្ទីរពេទ្យ និងសាលារៀន វិទ្យស្ថានកសិកម្ម ផ្លូវថ្នល់ ស្ពាន និងកំពង់ផែកំពង់សោម (បច្ចុប្បន្នព្រះសីហនុ)។ ដោយមានជំនួយរបស់រុស្ស៊ី ការផ្គត់ផ្គង់ថាមពលអគ្គិសនីនៃទីក្រុងធំបំផុតត្រូវបានបង្កើតឡើងវិញ ក្រៅពីនោះមានការសាងនូវស្ថានីយ៍ទូរស័ព្ទ ប្រព័ន្ធធារាសាស្រ្ត និងអគារជាច្រើនទៀត។ 

 លោកអនុរដ្ឋមន្រ្តីបានបន្ថែមទៀតដែរថា នៅដំណាក់កាលបច្ចុប្បន្ន ចំណងមិត្តភាពរុស្ស៊ី-កម្ពុជា មានប្រកបដោយការជឿទុកចិត្តគ្នា និងកិច្ចសហប្រតិបត្តិការជាស្ថាបនា។ ព្រោះវាឈរលើគ្រឹះនៃការចុះហត្ថលេខាលើសេចក្តីប្រកាសរួមនៅក្នុងឆ្នាំ១៩៩៥ ស្តីពីមូលដ្ឋានគ្រឹះនៃទំនាក់ទំនងមិត្តភាព។ ការសន្ទនានយោបាយកំពុងអភិវឌ្ឍយ៉ាងសកម្ម រួមទាំងលើកម្រិតខ្ពស់និង ខ្ពស់បំផុត។ អន្តរកម្មដ៏ជិតស្និតត្រូវបានបង្កើតឡើងរវាងក្រសួងការបរទេស ហើយមាន ការអន្តរកម្មយ៉ាងសកម្មតាមរយៈសភាគណបក្សនយោបាយ យុវជន អង្គការសាសនា និងស្ថាប័នសន្តិសុខជាដើម។

 យ៉ាងណាក៏ដោយរុស្ស៊ីបានសន្យាថា ខ្លួនកំពុងខិតខំប្រឹងប្រែងជំរុញកិច្ចសហប្រតិបត្តិការក្នុងវិស័យពាណិជ្ជកម្ម និងការវិនិយោគ វិទ្យសាស្រ្តបច្ចេកទេស វប្បធម៌ និងមនុស្សធម៌។ ខ្ញុំជឿជាក់ថា បទពិសោធន៍ប្រវត្តិសាស្រ្តដ៏សំបូរបែប ដែលប្រមូលបានក្នុងរយៈពេលជាង៦ទស្សវតរ៍កន្លះ និងជួយស្វែងរកឱកាសថ្មីៗដើម្បីពង្រឹងមិត្តភាពជាប្រពៃណី បង្កើនកិច្ចសហប្រតិបត្តិការជាក់ស្តែង និងការផ្លាស់ប្តូរគ្នាមានប្រយោជន៍ទៅវិញទៅមក ដើម្បីជាផលប្រយោជន៍ដល់ប្រជាជនប្រទេសទាំងពីរ ក្នុងផលប្រយោជន៍ធានា ស្ថេរភាព សន្តិសុខ និងការអភិវឌ្ឍ ប្រកបដោយចីរភាពនៅក្នុងតំបន់អាស៊ីប៉ាស៊ីហ្វិក និងពិភពលោកទាំងមូលផងដែរនេះបើតាមការលើកឡើងបន្ថែមរបស់លោក Igor_Morgulov៕ អត្ថបទ ៖ ចក់