អុីស្រាអែល ៖ រដ្ឋាភិបាលសាសនាជាតិនិយមរបស់ប្រទេសអ៊ីស្រាអែល បានអនុម័តការសាងសង់លំនៅឋាន

បន្ថែមប្រមាណ ៥.៧០០ ខ្នងកាលពីថ្ងៃចន្ទ សម្រាប់អ្នកតាំងលំនៅជនជាតិជ្វីហ្វនៅតំបន់គ្រប់គ្រង West Bank ទោះបីជាមានសម្ពាធរបស់​សហរដ្ឋអាមេរិក​ឲ្យបញ្ឈប់ការពង្រីកការតាំងទីលំនៅដែលទីក្រុងវ៉ាស៊ីនតោន មើលឃើញថាជាឧបសគ្គចំពោះសន្តិភាពជាមួយដែនដីប៉ាឡេស្ទីនក៏ដោយ។ ផែនការសម្រាប់ការអនុម័តនៃលំនៅឋាននៅក្នុងតំបន់ផ្សេងៗនៃតំបន់ West Bank ត្រូវបានអនុម័តដោយ​ក្រុមប្រឹក្សាផែនការ​ជាន់ខ្ពស់របស់ប្រទេសអ៊ីស្រាអែល។ ការអនុម័តចុងក្រោយត្រូវបានផ្តល់ឱ្យ ៨១៨ខ្នងផ្ទះ រួមទាំងខណៈលំនៅឋាន​ផ្សេង​ទៀតកំពុងស្ថិតក្នុងដំណាក់កាលផ្សេងគ្នានៃការអនុម័ត។ មេដឹកនាំអ្នកតាំងលំនៅជនជាតិជ្វីហ្វបានសាទរសេចក្តីសម្រេចនេះ។ ប្រទេសភាគច្រើនចាត់ទុកការតាំងទីលំនៅដែលបានសាងសង់នៅលើទឹកដីដែលអ៊ីស្រាអែលដណ្តើមយកនៅក្នុងសង្គ្រាមមជ្ឈិមបូព៌ាឆ្នាំ ១៩៦៧ ថាខុសច្បាប់។ វត្តមានការតាំងលំនៅទាំងនេះគឺជាបញ្ហាមូលដ្ឋានមួយក្នុងជម្លោះអ៊ីស្រាអែលនិងប៉ាឡេស្ទីន។ ប៉ាឡេស្ទីន ព្យាយាមបង្កើតរដ្ឋឯករាជ្យមួយនៅតំបន់ West Bank និងតំបន់ Gaza ដែលមានទីក្រុងហ្សេរុយសាឡឹមខាងកើតជារដ្ឋធានីរបស់ខ្លួន។ អ្នកតាំងលំនៅជនជាតិអ៊ីស្រាអែលបានលើកឡើងពីទំនាក់ទំនងជាប្រវត្តិសាស្ត្ររបស់ជនជាតិជ្វីហ្វចំពោះទឹកដីនេះ។ ការចរចាសន្តិភាពដែលត្រូវបានសម្របសម្រួលដោយសហរដ្ឋអាមេរិក បានជាប់គាំងតាំងពីឆ្នាំ ២០១៤មក។ ចាប់តាំងពីចូលកាន់តំណែងក្នុងខែមករា គណបក្សចម្រុះរបស់នាយករដ្ឋមន្ត្រីលោក Benjamin Netanyahu បានអនុម័តលើ​យុទ្ធនាការជំរុញសាងសង់លំនៅឋានថ្មីជាង ៧,០០០ខ្នងផ្ទះ ដែលភាគច្រើនចូលជ្រៅខ្លាំងនៅតំបន់ West Bank ។ អង្គការឃ្លាំមើលការតាំងទីលំនៅឋាន Peace Now បាននិយាយនៅក្នុងសេចក្តីថ្លែងការណ៍ថា រដ្ឋាភិបាលអ៊ីស្រាអែល​កំពុងជំរុញពួកយើងក្នុងល្បឿនដែលមិនធ្លាប់មានពីមុនមក ឆ្ពោះទៅរកការដាក់បញ្ចូលឧបសម្ព័ន្ធពេញលេញនៃតំបន់ West Bank។ ការកើន​ឡើង​អំពើហិង្សាក្នុងរយៈពេលប៉ុន្មានសប្តាហ៍កន្លងទៅនេះនៅតំបន់ West Bank រួមមានការផ្ទុះឡើង​ដោយអ្នកតាំង​លំនៅអ៊ីស្រាអែលជាច្រើននាក់នៅទីក្រុង និងភូមិនានារបស់ប៉ាឡេស្ទីន ដែលធ្វើឲ្យមានការថ្កោលទោសជាអន្តរជាតិ និងការ​ព្រួយបារម្ភពីសេតវិមាន។