រុស្ស៊ី ៖ មេបញ្ជាការទាហានស៊ីឈ្នូលរុស្ស៊ីលោក Yevgeny Prigozhin និយាយកាលពីថ្ងៃចន្ទថា ការបះបោររយៈពេល ១ថ្ងៃដោយកងកម្លាំង Wagner របស់លោក គ្មានបំណងចង់ផ្តួលរំលំរដ្ឋាភិបាលរុស្ស៊ីនោះទេ ប៉ុន្តែពួកគេមានបំណង​តវ៉ាចំពោះ​អ្វីដែលលោកនិយាយថា គឺជាទង្វើពុំត្រឹមត្រូវចំពោះជម្លោះនៅអ៊ុយក្រែន ។ 

នៅក្នុងសេចក្តីអធិប្បាយជាសាធារណៈលើកដំបូងរបស់លោក ចាប់តាំងពីបញ្ចប់ការបះបោរកាលពីល្ងាចថ្ងៃសៅរ៍ លោក Prigozhinបាននិយាយម្តងហើយម្តងទៀតពីអំណះអំណាងជារឿយៗរបស់លោកថា ទាហានស៊ីឈ្នួល Wagner គឺជា​កងកម្លាំងប្រយុទ្ធដ៏មានប្រសិទ្ធភាពបំផុតនៅរុស្ស៊ី ហើយសូម្បីតែនៅលើពិភពលោក ហើយវាបានធ្វើឲ្យអង្គភាព​របស់​លោករងភាពអាម៉ាស់ កាលដែលទីក្រុងម៉ូស្គូ បញ្ជូនពួកគេទៅកាន់អ៊ុយក្រែនកាលពីថ្ងៃទី ២៤ ខែកុម្ភៈ ឆ្នាំ ២០២២ ។ 

លោកនិយាយថា វីធីដែលពួកគេអាចរឹបអូសទីក្រុងភាគខាងត្បូង Rostov-on-Donរបស់រុស្ស៊ី ដោយគ្មានការបង្ហូរឈាម​គ្នា និងបញ្ជូនក្បួនរថពាសដែកទៅនៅចម្ងាយ ២០០គ.មពីទីក្រុងម៉ូស្គូ គឺជាសក្ខីកម្មបញ្ជាក់ពី​ប្រសិទ្ធិភាពក្រុម​ប្រយុទ្ធរបស់​លោក ។ 

លោកបាននិយាយនៅក្នុងសារជាសំឡេងរយៈពេល ១១នាទីបង្ហោះនៅលើបណ្តាញព័ត៌មានសង្គម Telegramថា ពួកយើងបានបង្ហាញពីលំដាប់ថ្នាក់ជំនាញ ដូចដែលពួកយើងបានធ្វើនៅថ្ងៃទី ២៤ ខែកុម្ភៈ ឆ្នាំ ២០២២ ។ ពួកយើងគ្មានគោលបំណងផ្តួលរំលំរបបដែលមានស្រាប់ ហើយនិងរដ្ឋាភិបាលជាប់ឆ្នោតស្របច្បាប់នោះទេ 

លោក Prigozhin នៅតែលើកឡើងសារជាថ្មីពីការចោទប្រកាន់បើទោះបីជាគ្មានភស្តុតាងយ៉ាងណាក្តីថា យោធារុស្ស៊ី បានវាយប្រហារដោយមីស៊ីល ហើយបន្ទាប់មកដោយឧទ្ធម្ភាគចក្រទៅលើជំរំទ័ពរបស់ទាហាន Wagner បណ្តាលឲ្​យកងកម្លាំងរបស់លោកប្រហែល ៣០នាក់ បាត់បង់ជីវិត ហើយនេះគឺជាហេតុផល​បន្ទាន់សម្រាប់អ្វីដែល​លោកចាត់​ទុកថាជាការដើរឆ្ពោះទៅរកយុត្តិធម៌ ។ 

លោក លោក Prigozhin និយាយទៀតថា ទាហាន Wagner បានបញ្ឈប់ការរុលទៅមុខរបស់ខ្លួនឆ្ពោះទៅកាន់ទីក្រុងម៉ូស្គូ នៅពេលដែលពួកគេយល់ឃើញថា ពួកគេនឹងត្រូវតតាំងជាមួយទាហានរុស្ស៊ីដែលកំពុងរង់ចាំ ហើយការបង្ហូរឈាមគ្នា នឹងមិនអាចជៀសផុតបាននោះទេ ៕