មីយ៉ាន់ម៉ា ៖ ឧត្តមស្នងការទទួលបន្ទុកជនភៀសខ្លួន របស់អង្គការសហប្រជាជាតិ (UNHCR) បាននិយាយកាលពីថ្ងៃចន្ទថា ជនភៀសខ្លួនជាង ២,៤ លាននាក់នៅទូទាំងពិភពលោកនឹងត្រូវការតាំងទីលំនៅថ្មីនៅឆ្នាំ ២០២៤ ដែលជាកំណើន ២០ ភាគរយបើធៀបនឹងឆ្នាំ ២០២៣។

យោងតាមរបាយការណ៍វាយតម្លៃតម្រូវការតាំងទីលំនៅថ្មីជាសកលសម្រាប់ឆ្នាំ២០២៤ បានឱ្យដឹងថា តំបន់អាស៊ីស្ថិត​នៅលើបញ្ជី​នៃតម្រូវការប៉ាន់ស្មានសម្រាប់ឆ្នាំ ២០២៤ ដោយមានជនភៀសខ្លួនជិត ៧៣០.០០០ នាក់ត្រូវការគាំទ្រ​ការតាំងទីលំនៅថ្មី ដែលចំនួននេះតំណាងឱ្យ ៣០ ភាគរយនៃតម្រូវការសកល។

របាយការណ៍នោះ បាននិយាយថា ជាមួយនឹងវិបត្តិនៅប្រទេសស៊ីរីអូសបន្លាយដល់ឆ្នាំទី ១៣ ហើយនៅតែជា​មូលហេតុ​នៃ​ស្ថានភាពជនភៀសខ្លួនដ៏ធំបំផុតនោះ ជនភៀសខ្លួនស៊ីរីបន្តបង្ហាញពីតម្រូវការតាំងទីលំ​នៅថ្មីខ្ពស់បំផុត​សម្រាប់រយៈ​ពេលប្រាំបីឆ្នាំជាប់ៗគ្នា។ ប្រជាជនស៊ីរីប្រហែល ៧៥៤.០០០នាក់នៅទូទាំងពិភពលោក​ត្រូវការជំនួយជា​បន្ទាន់ក្នុង​ដំណើរ​ការតាំងទីលំនៅថ្មីនេះ។

បណ្ដាជនភៀសខ្លួនមកពីប្រទេសអាហ្វហ្គានីស្ថាន ត្រូវបានប៉ាន់ប្រមាណថាមានតម្រូវការតាំងទីលំនៅថ្មីខ្ពស់បំផុតទីពីរ បន្ទាប់មកគឺប្រទេសស៊ូដង់ខាងត្បូង សហភាពមីយ៉ាន់ម៉ា និងសាធារណរដ្ឋប្រជាធិបតេយ្យកុងហ្គោ។

យោងតាមឧត្តមស្នងការអង្គការសហប្រជាជាតិ UNHCR កាលពីឆ្នាំ២០២២ ក្នុងចំណោមពាក្យស្នើសុំប្រមាណ ១១៦.០០០នាក់ មានតែជនភៀសខ្លួន ៥៨.៤៥៧ នាក់ប៉ុណ្ណោះដែលអាចចាកចេញទៅតាំងលំនៅថ្មីបាន។

UNHCR និយាយថា ការតាំងលំនៅថ្មីផ្តល់នូវខ្សែជីវិតនៃក្តីសង្ឃឹម និងការការពារដល់អ្នកដែល​ប្រឈមនឹង​ហានិភ័យ​ខ្លាំងបំផុត ដោយផ្តល់នូវដំណោះស្រាយយូរអង្វែង ខណៈពេលដែលកាត់បន្ថយសម្ពាធលើប្រទេសដែលជាម្ចាស់ផ្ទះ៕