ចិន ៖ រដ្ឋមន្ត្រីការពារជាតិចិន លោក Li Shangfu បាននិយាយនៅថ្ងៃអង្គារនេះ ខណៈលោកបានជួប​សមភាគីវៀតណាម​ថា ប្រទេសចិនមានឆន្ទៈធ្វើការជាមួយប្រទេសវៀតណាម ដើម្បីពង្រឹងទំនាក់ទំនង​និងកិច្ចសហប្រតិបត្តិការ​កម្រិតខ្ពស់រ​វាងយោធារបស់ប្រទេសទាំងពីរ។

ក្រសួងការពារជាតិចិន បាននិយាយនៅក្នុងសេចក្តីថ្លែងការណ៍ថា នៅក្នុងកិច្ចប្រជុំនៅទីក្រុងប៉េកាំង លោក Li បាន​និយាយ​ថា ស្ថានភាពអន្តរជាតិមានភាពវឹកវរ និងប្រទាក់ប្រឡាគ្នា ហើយសន្តិសុខនៅតំបន់​អាស៊ីប៉ាស៊ីហ្វិក​កំពុងប្រឈម​មុខបញ្ហាជាច្រើន។

លោក Li បាននិយាយនៅក្នុងកិច្ចពិភាក្សាជាមួយរដ្ឋមន្ត្រីក្រសួងការពារជាតិវៀតណាម លោក Phan Van Giang (ផាន់ វ៉ាន់ សាង) ថា ចិន និងវៀតណាមគួរតែបន្តធ្វើការរួមដៃគ្នា និងរួបរួមយ៉ាងជិតស្និទ្ធក្នុងដំណើរថ្មីនៃសង្គមនិយម ការពារផលប្រយោជន៍យុទ្ធសាស្ត្ររួមរបស់ប្រទេសទាំងពីរ និងរួមចំណែកជាវិជ្ជមានដល់សន្តិភាព និងស្ថិរភាព​ក្នុង​តំបន់។ ។ លោក Li បានប្រាប់លោក Phan ថា ទំនាក់ទំនងរវាងយោធារបស់ប្រទេសទាំងពីរមានការវិវឌ្ឍនយ៉ាងល្អ ដោយលោកបាននិយាយថា យោធារបស់ប្រទេសចិនមានឆន្ទៈជំរុញទំនាក់ទំនងទៅរកកម្រិតថ្មីមួយ។

កិច្ចប្រជុំរបស់រដ្ឋមន្ត្រីទាំងពីរបានធ្វើឡើងបន្ទាប់ពីនាវា USS Ronald Reagan បានឈប់ចតនៅកំពង់ផែ Danang របស់ប្រទេសវៀតណាមកាលពីថ្ងៃអាទិត្យ ជាលើកទីបីដោយនាវាផ្ទុកយន្តហោះសហរដ្ឋអាមេរិក ចាប់តាំងពីចុងបញ្ចប់​នៃសង្គ្រាមវៀតណាម។ ដំណើរទស្សនកិច្ចរបស់កងទ័ពជើងទឹកអាមេរិក កើតមានឡើងក្នុង​ពេលមានភាពតាន​តឹងរវាងប្រទេសចិន និងសហរដ្ឋអាមេរិក នៅក្នុងសមុទ្រចិនខាងត្បូង ដែលភាគច្រើនប្រទេសចិនបានអះអាងសិទ្ធ ខណៈប្រទេសមហាអំណាចទាំងពីរកំពុងជំរុញដណ្តើមឥទ្ធិពលនៅក្នុងតំបន់ដែលសម្បូរថាមពល។