អ៊ុយក្រែន ៖ លោក Ihor Kniazevគឺជាអ្នកភូមិមួយរូបរបស់អ៊ុយក្រែន បានប្រើប្រាស់ហិបគ្រាប់រំសេវរុស្ស៊ី ដែលសេស​សល់ពីការដកទ័ពរបស់រុស្ស៊ីកាលពីរដូវស្លឹកឈើជ្រុះមុន ដើម្បីសាងសង់ផ្ទះរបស់លោកឡើងវិញ ក្រោយរងការ​ខូចខាតដោយសារសង្រ្គាម។ 

ក្រោយកសិដ្ឋានរបស់លោករងការវាយប្រហារដោយរ៉ុក្កែត និងគ្រាប់កាំភ្លើងធំគ្រប់ប្រភេទ លោក Ihor Kniazev វ័យ ៤៣ឆ្នាំ ដែលជាឪពុកកូន៣នាក់ ចង់សាងសង់ទីលំនៅរបស់លោកឡើងវិញ ឲ្យបានលឿនតាមដែលអាចធ្វើទៅបាន ។ 

លោក Ihor Kniazevពន្យល់ថា នៅពេលដែលទាហានរុស្ស៊ីដកចេញពីតំបន់ Kharkivលោកក៏បានទៅពិនិត្យមើល​ទីតាំងការពារពីមុនរបស់ពួកគេ ។ 

កសិកររូបនេះបន្តថា ហិបទាំងអស់នេះខាងក្នុងពិតជានៅល្អខ្លាំងណាស់ វាពិតជាពិបាកដោះចេញ។ ខ្ញុំគិតថា ពួកគេធ្វើអ្វីមួយដើម្បីធ្វើឲ្យឈើហិបទាំងអស់រឹងមាំ ។ 

ដោយឡែក លោក Anatoliiវ័យ ៨០ឆ្នាំ គឺជាឪពុករបស់គាត់ និយាយថា ការសាងសង់ផ្ទះជាមួយស៊ីម៉ង់ត៍ នឹងត្រូវប្រើពេលយូរជាងនេះ ។ ជាមួយនឹងហិបទាំងអស់នេះ ពួកយើងយល់ឃើញថាវាគឺ​ជាជម្រើស​ល្អបំផុតនៅពេលនេះ ៕