ប៉ាគីស្ថាន ៖ អាជ្ញាធរគ្រប់គ្រងគ្រោះមហន្តរាយខេត្ត បាននិយាយនៅក្នុងសេចក្តីថ្លែងការណ៍កាលពីថ្ងៃចន្ទថា មនុស្ស​យ៉ាង​ហោចណាស់ ១៣ នាក់ស្លាប់ និង១៧នាក់ផ្សេងទៀតបានរងរបួសនៅក្នុងឧបទ្ទវហេតុទាក់ទងនឹងភ្លៀងធ្លាក់នៅក្នុងផ្នែកមួយចំនួននៃខេត្ត Punjab ភាគកណ្តាលរបស់ប្រទេសប៉ាគីស្ថានក្នុងរយៈពេល ២៤ ម៉ោងកន្លងទៅនេះ។

នៅទីក្រុង Lahore ជាទីរួមខេត្ត Punjab ចរាចរណ៍និងអ្នកដំណើរថ្មើរជើង ត្រូវបានគេមើលឃើញថាកំពុងធ្វើដំណើរ​តាមដងផ្លូវលិចទឹកកាលពីថ្ងៃចន្ទ បន្ទាប់ពីមានភ្លៀងធ្លាក់ខ្លាំងពេញមួយយប់។ អាជ្ញធារគ្រប់គ្រងគ្រោះមហន្តរាយ បាននិយាយថា អ្នកស្លាប់រហូតមកដល់ពេលនេះ គឺដោយសាររន្ទះបាញ់ និងការបាក់រលំដំបូល ភាគច្រើននៅក្នុងក្រុង Narowal និងក្រុង Sheikhupura ។

ប្រព័ន្ធផ្សព្វផ្សាយក្នុងតំបន់បានរាយការណ៍ថា ភ្លៀងធ្លាក់មុនរដូវមូសុងក៏បានវាយប្រហារខេត្ត Khyber Pakhtunkhwa ភាគពាយ័ព្យរបស់ប្រទេស និងខេត្ត Balochistan ភាគនិរតីកាលពីព្រឹកថ្ងៃចន្ទ។ នាយកដ្ឋានឧតុនិយមរបស់ប្រទេសប៉ាគីស្ថានបាននិយាយថា ភ្លៀងធ្លាក់ខ្លាំង និងព្យុះភ្លៀង ត្រូវបានព្យាករណ៍នៅតំបន់​ខ្ពង់រាប និងភាគកណ្តាលប្រទេសចាប់ពីថ្ងៃទី ២៥ ដល់ថ្ងៃទី ៣០ ខែមិថុនា ដោយមានចន្លោះពេលម្តងម្កាល។ រដូវកាលភ្លៀងមូសុងរបស់ប្រទេសនេះ ជាធម្មតាចាប់ផ្តើមនៅសប្តាហ៍ដំបូងនៃខែកក្កដា ដែលមានរយៈពេល​រហូតដល់ពាក់កណ្តាលខែកញ្ញា។