អាមេរិក ៖ ការទូទាត់សំណងចំនួន ២៩០ លានដុល្លាររវាងធនាគារធំបំផុតរបស់អាមេរិក និងក្រុមអ្នកចោទ​ប្រកាន់លោក Jeffery Epstein ត្រូវបានផ្តល់ការព្រមព្រៀងជាបឋមដោយចៅក្រមអាមេរិកកាលពីថ្ងៃចន្ទ។ ក្រុមស្ត្រីចោទប្រកាន់ទាំងនោះនិយាយថា លោក Epstein បានបំពានផ្លូវភេទលើពួកគេ ហើយថាក្រុមហ៊ុនហិរញ្ញវត្ថុ JPMorgan មិនបានអើពើលើការជួញដូរផ្លូវភេទរបស់អតីតហិរញ្ញិករូបនេះទេ។

ចៅក្រមប្រចាំតំបន់របស់តុលាការសហព័ន្ធសហរដ្ឋអាមេរិកលោក Jed Rakoff បាននិយាយថា "នេះគឺជាការដោះ​ស្រាយដ៏ល្អមួយ" ។ លោក Rakoff បានយល់ព្រមលើការទូទាត់ស្រដៀងគ្នានេះចំនួន ៧៥ លានដុល្លារជុំវិញ​ករណីលោក Epstein ពីធនាគារអាឡឺម៉ង់ Deutsche Bank (ដយឆ៍បែង) កាលពីដើមខែនេះ។ លោកបាននិយាយថា ទាំងនេះគឺជាសំណង "ដ៏ច្រើន" សម្រាប់ជនរងគ្រោះដោយសារលោក Epstein ទោះបីជាចំនួននេះមិន​អាចទូទាត់​សម្រាប់​ការរំលោភបំពានដែលពួកគេទទួលរងក៏ដោយ។

បណ្តឹងរួមប្រឆាំងនឹងក្រុមហ៊ុនហិរញ្ញវត្ថុ JPMorgan បានចោទប្រកាន់ធនាគារនេះថាមិនអើពើនឹងសញ្ញាព្រមាននៃការ​រំលោភ​បំពានរបស់ហិរញ្ញិកដែលគួរឱ្យអាម៉ាស់រូបនេះ ហើយរក្សាទំនាក់ទំនងជាមួយលោក Epstein ជាយូរមកហើយ បន្ទាប់ពីលោកបានចាកចេញជាផ្លូវការក្នុងនាមជាអតិថិជន។

ធនាគារនេះបានបន្តរក្សាតំណែងរបស់លោក Epstein បន្ទាប់ពីលោកបានផ្ដល់ចម្លើយពីភាពមានទោសចំពោះការចោទ​ប្រកាន់ទាក់ទងនឹងពេស្យាកម្មកាលពីឆ្នាំ ២០០៨ ហើយលោកត្រូវបានចុះបញ្ជីជាជនប្រព្រឹត្តល្មើសផ្លូវភេទ។ ទន្ទឹមនឹងនេះដែរ ក្រុមហ៊ុន JPMorgan ប្រឈមនឹងបណ្តឹងមួយទៀតលើករណីលោក Epstein ពីប្រជុំកោះ Virgin របស់សហរដ្ឋអាមេរិក ជាទីដែលលោក Epstein កាន់កាប់កោះចំនួនពីរ ហើយលោកត្រូវបានចោទប្រកាន់​ថាបានបំពានផ្លូវភេទជនរងគ្រោះនៅក្នុងវិមានរបស់ខ្លួន។

លោក Epstein បានស្លាប់នៅក្នុងពន្ធនាគារ Manhattan កាលពីឆ្នាំ២០១៩ ខណៈពេលដែលកំពុងរង់ចាំ​ការកាត់​ទោសពីបទជួញដូរផ្លូវភេទ។ ការស្លាប់របស់លោកត្រូវបានវិនិច្ឆ័យថាជាការធ្វើអត្តឃាតដោយក្រុមគ្រូពេទ្យកោសល្យវិច្ច័យ នៅទីក្រុងញូវយ៉ក សហរដ្ឋអាមេរិក៕