ចិន ៖ នាយករដ្ឋមន្ត្រីនូវ៉ែលសេឡង់ លោក Chris Hipkins បានគូសបញ្ជាក់ពីសារៈសំខាន់នៃកិច្ចព្រមព្រៀង​ពាណិជ្ជកម្ម​នៅថ្ងៃអង្គារទី២៧ ខែ មិថុនានេះ នៅវេទិកាសេដ្ឋកិច្ចពិភពលោកនៅទីក្រុងធានជីន ខណៈប្រទេសចិនក៏កំពុងដាក់​ពាក្យសុំចូលរួមកិច្ចព្រមព្រៀងពាណិជ្ជកម្មធំបំផុតរបស់ពិភពលោកនេះផងដែរ។ លោក Hipkins បាននិយាយថា ប្រទេសនូវ៉ែលសេឡង់បានប្តេជ្ញាចិត្តចំពោះកិច្ចព្រមព្រៀងគ្រប់ជ្រុងជ្រោយ និងរីកចម្រើនសម្រាប់ភាព​ជាដៃគូអន្តរប៉ាស៊ីហ្វិក (CPTPP) ជាកតិការពាណិជ្ជកម្មក្នុងតំបន់ដែលត្រូវបានព្រមព្រៀងក្នុងឆ្នាំ ២០១៨ រវាងប្រទេសចំនួន ១១ ដែលទាំងប្រទេសចិន និងកោះតៃវ៉ាន់ បានដាក់ពាក្យចូលរួម។ កាលពីព្រឹកថ្ងៃចន្ទ រដ្ឋមន្ត្រីពាណិជ្ជកម្មប្រទេសនូវ៉ែលសេឡង់ បាននិយាយថា លោកមានការពិភាក្សា​ជាវិជ្ជមានជាមួយសមភាគីចិនអំពីការចូលរួមរបស់ទីក្រុងប៉េកាំងក្នុងកិច្ចព្រមព្រៀងគ្រប់ជ្រុងជ្រោយ និងរីកចម្រើន សម្រាប់ភាព​ជាដៃគូអន្តរប៉ាស៊ីហ្វិក (CPTPP) ។

នៅក្នុងសុន្ទរកថាដ៏ទូលំទូលាយ លោក Hipkins ក៏បាននិយាយផងដែរថា ការធ្វើការរួមគ្នាដើម្បីដោះស្រាយបញ្ហា​ប្រឈមនានា​ពាក់ព័ន្ធនឹងបម្រែបម្រួលអាកាសធាតុ និងការផ្លាស់ប្តូរចំនួនប្រជាជនគឺមានសារៈសំខាន់ ហើយបានលើកទឹកចិត្តដល់​ប្រទេសមួយចំនួនឱ្យមើលទៅខាងក្រៅដើម្បីដោះស្រាយ​បញ្ហារយៈពេលវែងដោយមិន​កំណត់ជាក់លាក់។ ប្រទេសចិនគឺជាទីផ្សារនាំចេញធំបំផុតរបស់ប្រទេសនូវែលសេឡង់ ហើយលោក Hipkins ត្រូវបានគេរំពឹងថានឹងជួបជាមួយប្រធានាធិបតីលោក Xi Jinping ក្រោយថ្ងៃអង្គារ ព្រមទាំងនាយករដ្ឋមន្ត្រីលោក Li Qiang មុនពេលលោកត្រលប់ទៅប្រទេសវិញនៅថ្ងៃសុក្រ។