អុីស្រាអែល ៖ ក្រុមបាតុករប្រឆាំងរដ្ឋាភិបាលរាប់រយនាក់បានបិទផ្លូវមួយកន្លែង ហើយបានប៉ះទង្គិចជាមួយនគរបាល​នៅក្នុងបាតុកម្មដែល​បានក្លាយទៅជាអំពើហិង្សានៅខាងក្រៅនិវេសនដ្ឋានរបស់រដ្ឋមន្ត្រីយុត្តិធម៌អ៊ីស្រាអែលលោក Yariv Levin ក្នុងទីក្រុង ម៉ូឌីន របស់ប្រទេសអ៊ីស្រាអែល នៅថ្ងៃអង្គារ (២៧ មិថុនា)នេះ។

ក្រុមអ្នកតវ៉ាបានវាយស្គរ ដុតកង់ឡាន និងព្យួរស្លាកសញ្ញាធំៗនៅលើរានហាលរជិតខាងនោះ ដោយចោទប្រកាន់ "លោកនាយករដ្ឋមន្ត្រី Levin" ពីបទ "ក្រសោបយកប្រទេសនេះ" ដោយសំដៅលើអ្វីដែលពួកគេនិយាយថាជាឥទ្ធិពលដែលរដ្ឋមន្ត្រីយុត្តិធម៌រូបនេះមានលើនាយករដ្ឋមន្ត្រីអ៊ីស្រាអែលលោក Benjamin Netanyahu និងដំណើរការកែប្រែតុលាការ។

នគរបាលអ៊ីស្រាអែលបាននិយាយថា មនុស្ស៦នាក់ ត្រូវបានចាប់ឃុំខ្លួនក្នុងការតវ៉ានោះ។ សំណើឲ្យមានការផ្លាស់ប្តូរនេះ ដែលរួមមានការទប់ស្កាត់​សមត្ថភាពរបស់តុលាការក្នុងការចេញសេចក្តីសម្តេចប្រឆាំងនឹងរដ្ឋាភិបាល បានបង្កឱ្យមានការតវ៉ាតាមដងផ្លូវជាញឹកញាប់ជាច្រើនខែនៅទូទាំងប្រទេស។

វាកើតឡើងបន្ទាប់ពីសមាជិកសភាអ៊ីស្រាអែលបានចាប់ផ្តើមជជែកដេញដោលលើច្បាប់ដែលនឹងរឹតត្បិតអំណាចរបស់តុលាការកំពូល ដោយរៀបចំឡើងវិញនូវប្រព័ន្ធច្បាប់ដែលមានប្រឆាំងយ៉ាងខ្លាំងក្លាបន្ទាប់ពីត្រូវបានស្នើឡើងដោយក្រុមចម្រុះសាសនា-ជាតិនិយមរបស់លោកនាយករដ្ឋមន្ត្រី Netanyahu៕