នាវាដឹកយន្តហោះសហរដ្ឋអាមេរិក១គ្រឿង និងនាវាចម្បាំងបំពាក់មីស៊ីលតម្រង់គោលដៅ ២គ្រឿង បានធ្វើដំណើរមកដល់ប្រទេសវៀតណាម សម្រាប់ដំណើរទស្សនកិច្ចមេត្រីភាពរយៈពេល ៦ថ្ងៃ ដែលជាការចាប់ផ្តើមព្រឹត្តការណ៍សំខាន់នៃទំនាក់ទំនងល្អប្រសើររវាងអតីតប្រទេស​សត្រូវអំឡុង​សម័យ​សង្រ្គាមទាំង២ ។

នាវាដឹកយន្តហោះ USS Ronald Reagan និងនាវាចម្បាំងបំពាក់មីស៊ីលតម្រង់គោលដៅ USS Antietam និង USS Robert Smalls បានធ្វើដំណើរមកដល់ទីក្រុងដាណាង កាលពីថ្ងៃអាទិត្យ ដែលជាដំណើរ​ទស្សនកិច្ចលើកទី ៣ ចាប់តាំងពីឆ្នាំ ២០១៨ ហើយនាវាទាំងនេះ នឹងបន្តចតនៅកំពង់ផែ​ក្រុងដាណាង រហូតដល់ថ្ងៃទី ៣០ខែមិថុនាខាងមុខ ។

យោងតាមសេចក្តីរាយការណ៍របស់ទីភ្នាក់ងារព័ត៌មាន APបានឲ្យដឹងថា ក្រុមមន្រ្តីមកពីនាវាដឹក​យន្តហោះ Ronald Reaganបានចុះពីលើនាវាកាលពីថ្ងៃអាទិត្យ ហើយពួកគេត្រូវបានស្វាគមន៍​យ៉ាងកក់ក្តៅពីក្រុមមន្រ្តីវៀតណាម ក្រោយពេលចូលចតនៅកំពង់ផែក្រុងដាណាង ។

លោកឧត្តមនាវីទោ Pat Hannifinដែលជាមេបញ្ជាការកងនាវាចម្បាំងអាមេរិក បាននិយាយនៅក្នុង​សេចក្តីថ្លែង​ការណ៍​ដែលបានប្រកាសការមកដល់របស់នាវាថា ពួកយើងពិតជារំភើបចិត្តខ្លាំងណាស់​ពេលមកដល់ប្រទេសវៀតណាម ហើយនិងសូមស្ងើចសរសើរចំពោះការស្វាគមន៍ដែលកង​នាវាចម្បាំងរបស់ពួកយើងទទួលបាន ។

លោកបន្តថា ដំណើរទស្សនកិច្ចបែបនេះ នឹងពង្រឹងដល់ភាពជាដៃគូ និងការប្តេជ្ញាចិត្តរបស់ពួក​យើងក្នុងការប្រឈមដោះស្រាយបញ្ហារួមនៅក្នុងតំបន់ត្រួតត្រាសមុទ្រ ។

យោងតាមសេចក្តីថ្លែងការណ៍របស់កងទ័ពជើងទឹកសហរដ្ឋអាមេរិក បានឲ្យដឹងថា ខណៈពេលស្នាក់​នៅក្នុងប្រទេសវៀតណាម សមាជិកនាវិកនឹងចូលរួមសកម្មភាពការទូត​សាធារណៈជាច្រើន រួមទាំងការផ្លាស់ប្តូរវប្បធម៌ ​និងអាជីព ​ដូចជាគម្រោងសេវាកម្មសហគមន៍ ការប្រកួតកីឡា និងការធ្វើបដិសណ្ឋារកិច្ច ៕