ភ្នំពេញ៖ ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានក្រើនរម្លឹកដល់មន្ត្រីក្រោមឱវាទថា ដើម្បីបង្កើនប្រសិទ្ធភាពការងារឱ្យកាន់តែមានភាពល្អប្រសើបន្ថែមទៀត ត្រូវបង្កើនសកម្មភាពអនុវត្តច្បាប់ និងបទប្បញ្ញត្តិនានា បន្ថែមពីនេះទៀត
ត្រូវពង្រឹងសាមគ្គីភាព អនុវត្តការងារប្រកបដោយវិជ្ជាជីវៈ ឈរលើមូលដ្ឋានច្បាប់ និងមានតុល្យភាពការងារ។
ក្នុងឱកាសអញ្ញើញចូលរួមពិធីសម្ពោធដាក់ឱ្យប្រើប្រាស់ជាផ្លូវការនូវអគាររដ្ឋបាល និងមន្ទីរពិសោធន៍ខ្នាតតូចរបស់សាខាការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប.» ខេត្តក្រចេះ កាលពីព្រឹកថ្ងៃទី២៨ មិថុនា ឆ្នាំ២០២៣នេះ ឯកឧត្តមរដ្ឋមន្ត្រី បានលើកឡើងថា ក្រៅពីការងារប្រកបដោយវិជ្ជាជីវៈ មន្ត្រីរាជការ បុគ្គលិក ត្រូវបន្តកសាងលិខិតបទដ្ឋានគតិយុត្ត សម្រាប់ជាមូលដ្ឋានដល់ការអនុវត្តតួនាទី និងភារកិច្ចរបស់ខ្លួន ក៏ដូចជាការបង្កើនសកម្មភាពត្រួតពិនិត្យនៅតាមបណ្តាផ្សារ មជ្ឈមណ្ឌលចែកចាយ និងឃ្លាំងស្តុកទំនិញ ពិសេសម្ហូបអាហារ សំដៅអនុវត្តច្បាប់ស្តីពីសុវត្ថិភាពម្ហូបអាហារឱ្យមានប្រសិទ្ធភាព-ល-។
ឆ្លៀតក្នុងឱកាសនោះដែរ ឯកឧត្តមរដ្ឋមន្ត្រី បានលើកទឹកចិត្តឱ្យអគ្គនាយកដ្ឋាន បន្តអនុវត្តផែនការសកម្មភាពរបស់ខ្លួន សម្រេចបានលទ្ធផលល្អប្រសើរបន្តទៀត ដើម្បីធានាបាននូវសុខុមាលភាពជូនប្រជាពលរដ្ឋ ការពារផលប្រយោជន៍សេដ្ឋកិច្ចរបស់អ្នកប្រើប្រាស់ ពង្រីកពាណិជ្ជកម្មក្នុងស្រុក-ក្រៅស្រុក និងកាត់បន្ថយការនាំចូល ធានាឱ្យការប្រកួតប្រជែងក្នុងពាណិជ្ជកម្ម ប្រព្រឹត្តទៅប្រកបដោយសមធម៌។ លើសពីនេះ ត្រូវខិតខំបន្ថែមទៀត ក្នុងការអភិវឌ្ឍទាំងផ្នែកហេដ្ឋារចនាសម្ព័ន្ធរឹង ការកសាងបន្ថែមនូវបទប្បញ្ញត្តិនានា និងអភិវឌ្ឍកម្រិតជំនាញបច្ចេកទេសរបស់មន្ត្រី ឱ្យដើរទន្ទឹមគ្នាជាមួយសង្គម និងវិទ្យាសាស្ត្រ ដែលកំពុងមានការរីកចម្រើនឥតឈប់ឈរ។
ឯកឧត្តមរដ្ឋមន្ត្រី បានបន្ថែមទៀតថា យោងតាមអនុសាសន៍ដ៏ខ្ពង់ខ្ពស់របស់សម្ដេចនាយករដ្ឋមន្ត្រី ដែលបានចាត់ទុកបញ្ហាម្ហូបអាហារជាបញ្ហាសំខាន់ទី១ ក្នុងចំណោមអតុល្យភាពទាំង១២ ដែលត្រូវយកចិត្តទុកដាក់ស្វែងរកដំណោះស្រាយ, ក្រសួងពាណិជ្ជកម្ម បានដាក់ចេញនូវផែនការយុទ្ធសាស្ត្រសំខាន់ៗមួយចំនួន ដើម្បីលើកកម្ពស់សុវត្ថិភាពម្ហូបអាហារ ការពារអ្នកប្រើប្រាស់ និងធានាឱ្យការប្រកួតប្រជែងក្នុងពាណិជ្ជកម្ម ប្រព្រឹត្តទៅប្រកបដោយសមធម៌ និងជឿទុកចិត្ត។ ជាក់ស្ដែង ក្រសួង បានខិតខំប្រឹងប្រែងរៀបចំឱ្យមានប្រព័ន្ធច្បាប់ និងលិខិតបទដ្ឋានគតិយុត្តនានាសម្រាប់អនុវត្ត ព្រមទាំងបានកសាងនូវរចនាសម្ព័ន្ធរឹង ពិសេសមន្ទីរពិសោធន៍សម្រាប់គាំទ្រដល់ការអនុវត្តច្បាប់ និងលិខិតបទដ្ឋានគតិយុត្តទាំងនោះផងដែរ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
