​គណៈកម្មាធិការ​ជាតិ​រៀបចំ​ការបោះឆ្នោត បាន​ឲ្យ​ដឹង​កាលពី​ថ្ងៃ​អង្គារ (​ទី​២៧ ខែមិថុនា​) ថា ប្រធានាធិបតី​សៀ​រ៉ា​ឡេ​អូន លោក Julius Maada Bio បានឈ្នះ​ការបោះឆ្នោត​ប្រធានាធិបតី​របស់​ប្រទេស​អាហ្វ្រិក​ខាងលិច​មួយ​នេះ ដោយ​ទទួលបាន​សម្លេងឆ្នោត​ច្រើនជាង ៥៦​ភាគរយ ដោយ​ជ័យជម្នះ​នេះ បាន​នាំ​ឲ្យ​រូបលោក​ចៀស​ផុតពី​ការបោះឆ្នោត​ជុំ​ទី​២​ទល់នឹង​គូប្រជែង​ដ៏​ធំ​របស់លោក គឺ​លោក Samura Kamara​។​

​លោក Bio វ័យ ៥៩​ឆ្នាំ កំពុង​ឈរឈ្មោះ​សម្រាប់​ការបោះឆ្នោត​ឡើងវិញ បន្ទាប់ពី​អាណត្តិ​ទី​១ របស់លោក ត្រូវបាន​បំផ្លាញ​ដោយ​ការខកចិត្ត ដែលមាន​កាន់តែខ្លាំង​ឡើង ចំពោះ​បញ្ហា​សេដ្ឋកិច្ច​។​

​ប្រធាន​គណៈកម្មការ​ជាតិ​រៀបចំ​ការបោះឆ្នោត​របស់​ប្រទេស​សៀ​រ៉ា​ឡេ​អូន លោក Mohamed Kenewui Konneh បានប្រកាសថា​៖ «​ខ្ញុំ​សូមបញ្ជាក់ថា លោក Bio Julius Maada គឺជា​ប្រធានាធិបតី​ជាប់ឆ្នោត បន្ទាប់ពី​ទទួលបាន​សំឡេងឆ្នោត ៥៦,១៧​ភាគរយ​នៃ​សន្លឹកឆ្នោត​ដែល​យក​ជា​បានការ​»

​ចំណែក​លោក Kamara វ័យ ៧២​ឆ្នាំ​ដែល​រង​បរាជ័យ​ក្នុង​សំឡេង​យ៉ាង​កៀក​កិត នៅក្នុង​ការបោះឆ្នោត កាលពី​ឆ្នាំ​២០១៨ មាន​សំឡេងគាំទ្រ​ប្រមាណ​ជា ៤១​ភាគរយ​ នៃ​សន្លឹកឆ្នោត នាពេលនេះ​។ បន្ទាប់ពី​មានការ​ប្រកាស​លទ្ធផល​ចុងក្រោយ​នេះ លោក Kamara បានលើកឡើង​នៅលើ​បណ្ដាញ​សង្គម Twitter ថា​៖ «​លទ្ធផល​ទាំងនេះ​មិនគួរ​ឲ្យ​ទុកចិត្តបាន​នោះទេ ហើយ​ខ្ញុំ​បដិសេធ​យ៉ាង​ដាច់អហង្ការ​នូវ​លទ្ធផល​ដែល​បានប្រកាស​ដោយ​គណៈកម្មាធិកា​រ​ជាតិ​រៀបចំ​ការបោះឆ្នោត​នេះ​»​។​

​ការបោះឆ្នោត ដែល​បាន​ធ្វើឡើង​កាលពី​ថ្ងៃ​សៅរ៍ (​ទី​២៤ ខែមិថុនា​) ចុង​សប្ដាហ៍​មុន មាន​ភាព​តានតឹង​យ៉ាងខ្លាំង ដោយមាន​អំពើហិង្សា​ផ្ទុះឡើង នៅមុន អំឡុងពេល និង​ក្រោយ​ការបោះឆ្នោត​។​

​នៅមុននេះ គណបក្ស​របស់លោក Kamara បាន​ច្រានចោល​រួចហើយ​នូវ​លទ្ធផល​ខ្លះ ដែល​បង្ហាញ​ពី​ការ​នាំមុខ​របស់លោក Bio ដោយ​លើកឡើង​ពី​ភាពមិនប្រក្រតី និង​កង្វះ​តម្លាភាព​។ ជាមួយគ្នានេះ អ្នកសង្កេតការណ៍​អន្តរជាតិ និង​សហរដ្ឋអាមេរិក ក៏បាន​សម្តែង​កង្វល់​អំពី​កង្វះ​តម្លាភាព ក្នុង​ដំណើរការ​រាប់​សន្លឹកឆ្នោត​នេះដែរ​៕​