ភ្នំពេញ ៖ ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានអញ្ជើញប្រគល់​ប័ណ្ណសរសើរ​របស់រាជរដ្ឋាភិបាលកម្ពុជា ជូនថ្នាក់ដឹកនាំនិងមន្រី្តសុខាភិបាល នៃមនី្ទរពេទ្យកាល់ម៉ែត សាកលវិទ្យាល័យ​វិទ្យាសាស្រ្តសុខាភិបាល មនី្ទរពេទ្យព្រះអង្គឌួង មនី្ទរពេទ្យគន្ធបុប្ជា មជ្ឈមណ្ឌលជាតិគាំពារមាតា និងទារក និង​មជ្ឈមណ្ឌលជាតិកំចាត់រោគ របេង និងហង់សិន ដែលបានរួមចំណែកក្នុងការប្រយុទ្ធប្រឆាំងនឹងជំងឺកូវីដ-១៩, នារសៀលថ្ងៃទី២៨ ខែមិថុនា​នេះ។

ឯកឧត្តម សាស្រ្តាចារ្យ ម៉ម ប៊ុនហេង សូមពាំនាំនូវការសួរសុខទុក្ខ និងនឹករលឹកដ៏ខ្ពង់ខ្ពស់​ពីសំណាក់​សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រី នៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិត ជូនថ្នាក់ដឹកនាំ មន្ត្រីរាជការ និងបុគ្គលិកសុខាភិបាលអង្គភាពថ្នាក់កណ្ដាល ដែលមានវត្តមាននៅទីនេះ។

ជាមួយគ្នានេះឯកឧត្តម រដ្ឋមន្រី្ត បានរំលឹកអំពីការងារប្រយុទ្ធនឹងជំងឺកូវីដ-១៩ នាពេលកន្លង ដែលប្រទេសកម្ពុជា ត្រូវបានពិភពលោកប្រសិទ្ធនាមថា "កម្ពុជា ជាប្រទេសតូច មានបេះដូងធំទូលាយ ដោយបានគ្រប់គ្រង ឆ្លើយតប​ការរាតត្បាតជំងឺកូវីដ-១៩ ដោយជោគជ័យ គឺពិតជាមានមោទនៈភាព ចំពោះការខិតខំប្រឹងប្រែងដ៏អស្ចារ្យ របស់​សង្គមជាតិទាំងមូល រួមទាំងជនបរទេសទាំងអស់ ដែលស្នាក់នៅក្នុងប្រទេសកម្ពុជា ហើយសមិទ្ធផលគួរ​ឱ្យកត់​សម្គាល់នេះកើតឡើង ក្រោមការដឹកនាំផ្ទាល់ប្រកបដោយគតិបណ្ឌិតរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា តាមរយៈការប្រើប្រាស់កម្លាំងសរុបរបស់ជាតិ និងមានការ​ចូលរួម​របស់សង្គមជាតិទាំងមូល ដែលអាចឱ្យកម្ពុជាបើកដំណើរការឡើងវិញ ទាំងសកម្មភាពសេដ្ឋកិច្ច និង​សង្គម​តាំង​ពីខែវិច្ឆិកា ឆ្នាំ២០២១។ មេរៀនបទពិសោធន៍ទាំងអស់នេះ អាចឱ្យយើងយកឈ្នះលើសមរភូមិកូវីដ-១៩ តែ​រាជរដ្ឋាភិបាលនៅតែបន្តតាមដានដោយយកចិត្តទុកដាក់ ព្រោះសង្គ្រាមកូវីដ-១៩ មិនទាន់ចប់នៅឡើយ។ សមិទ្ធផលដ៏ធំធេងទាំងនេះ កើតចេញពីការដឹកនាំប្រកបដោយស្មារតីបុរេសកម្ម ចក្ខុវិស័យវែងឆ្ងាយ ឈ្លាសវៃរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ជាពិសេសការរក្សា​បាន​សន្តិភាព ស្ថិរភាពនយោបាយ សន្តិសុខ សណ្តាប់ធ្នាប់ និងសុវត្ថិភាពសង្គម ការគ្រប់គ្រងបានជំងឺកូវីដ-១៩ ការរក្សា​កំណើនសេដ្ឋកិច្ច ជីវភាពប្រជាជនរីកចម្រើន ការលើកកម្ពស់ កិត្យានុភាពកម្ពុជា នៅលើឆាកតំបន់ និង​អន្តរជាតិ តាមរយៈនយោបាយការបរទេសឯករាជ្យ ដោយផ្អែកលើច្បាប់។ ព្រះរាជាណាចក្រកម្ពុជា បានរៀបចំធ្វើ​ជាម្ចាស់​ផ្ទះ​ដោយជោគជ័យកិច្ចប្រជុំកំពូលអាស៊ាន ឆ្នាំ២០២២ ព្រមទាំងបានរៀបចំធ្វើជាម្ចាស់​ផ្ទះការប្រកួត​កីឡា​អាស៊ី​អាគ្នេយ៍​លើកទី៣២ និងអាស៊ានប៉ារ៉ា ហ្គេមលើកទី១២ ឆ្នាំ២០២៣ ក្នុងបរិយាកាសមហោឡារិក អធឹកអធម ល្បីខ្ទរខ្ទា ទូទាំង​ព្រះរាជាណាចក្រកម្ពុជា ក្នុងតំបន់ និងនៅលើសកលលោក។ ដូច្នេះតម្លៃសន្តិភាព ដែលកម្ពុជា​កំពុងតែមាន និង​ខិតខំថែរក្សា នៅពេលនេះ គឺពិតជាកត្តាសំខាន់បំផុត ដែលបងប្អូនជនរួមជាតិកម្ពុជាទាំងអស់ ត្រូវតែចងចាំជានិច្ច និងចូលរួមថែរក្សាការពារសន្តិភាពនេះឱ្យឋិតថេរជាអមតៈ។

ឯកឧត្តម សាស្រ្តាចារ្យ ម៉ម ប៊ុនហេង សូមវាយតម្លៃខ្ពស់ចំពោះកិច្ចសហការយ៉ាងល្អ រវាងអាជ្ញាធរ ស្ថាប័ន​ពាក់ព័ន្ធនានា​ក្នុង​ការទប់ស្កាត់ រាល់បាតុភាពអសកម្មទាំងឡាយ ដែលបានធ្វើឲ្យប៉ះពាល់ដល់សុខភាព និង​អាយុជិវិតរបស់​ប្រជាពលរដ្ឋ​ដោយ​បង្ក្រាបបានជាអតិបរមានូវការលក់ឱសថក្លែងក្លាយ ការនាំចូលឱសថ​ដែលពុំ​មានច្បាប់អនុញ្ញាត សេវាសុខាភិបាលខុសច្បាប់ ប្រកបដោយស្មារតីទទួលខុសត្រូវខ្ពស់។ សេវាសុខាភិបាលសាធារណៈ កាន់តែទទួលបានទំនុកចិត្តពីប្រជាជន តែយើងក៏ត្រូវតែខិតខំពង្រឹងបន្ថែមទៀត ជាពិសេសក្រមសីលធ៌ម វិជ្ជាជីវៈ អត្តចរិតស្លូតបូត រាក់ទាក់ ប្រកបដោយការយកចិត្តទុកដាក់ចំពោះអ្នកជំងឺ ដែលពួកគាត់ត្រូវការ ដើម្បីឲ្យពួកគាត់កាន់តែពេញចិត្ត និងគាំទ្រសេវាសុខាភិបាលរបស់យើង៕ អត្ថបទ៖ រដ្ឋា​