ក្រុមអ្នកធ្វើធម្មយាត្រាមូស្លីមបានចេញដំណើរកាលពីពេលព្រឹកព្រលឹមថ្ងៃអង្គារ (២៧ មិថុនា) នៅប្រទេសអារ៉ាប៊ីសាអូឌីត ដើម្បីប្រារព្ធពិធីបុណ្យ Arafa ដែលជាថ្ងៃដ៏សំខាន់បំផុត​នៃ​ធម្មយាត្រា​ហាជី។

អ្នកគោរពបូជាជាច្រើនអាចត្រូវបានគេឃើញដើរតាមដងផ្លូវនៃតំបន់ Arafat និងដើរឡើងលើភ្នំ Mercy នៅពេលថ្ងៃរះ ជាទីដែលព្យាការី Mohammad ត្រូវបានគេជឿថាបានស្វាធ្យាយ​ធម៌ចុងក្រោយរបស់ខ្លួនកាលពី ១៤ សតវត្សមុន។ ធម្មយាត្រាហាជីនេះ ជាកាតព្វកិច្ចម្តងក្នុងមួយជីវិតសម្រាប់ប្រជាជនម៉ូស្លីមដែលមានសមត្ថភាពគ្រេប់គ្រាន់ និងបានអាច​ចំណាយ​បានគ្រប់ៗគ្នា ត្រូវបានចាត់ទុកថាជាការជួបជុំសាសនាដ៏ធំបំផុតរបស់ពិភពលោក។

ក្រុមអ្នកធ្វើធម្មយាត្រានឹងនៅទីនោះរហូតដល់ថ្ងៃលិច មុនពេលធ្វើដំណើរទៅកាន់តំបន់វាលទំនាប Muzdalifa ជាទីដែលពួកគេនឹងប្រមូលគ្រួស ដើម្បីបោះទៅក្នុងចង្អូរថ្មដែល​ជានិមិត្តរូប​នៃអារក្ស។ ពិធីកម្មគប់ដុំថ្មនោះតំណាងឲ្យថ្ងៃដំបូងនៃពិធីបុណ្យអ៊ីត (Eid al-Adha) ឬពិធីបុណ្យបូជា ដែលនឹងប្រារព្ធឡើងដោយអ្នកកាន់សាសនាឥស្លាមទូទាំងពិភពលោកនៅថ្ងៃពុធ (២៨ មិថុនា)នេះ។

ក្រុមអាជ្ញាធរអារ៉ាប៊ីសាអូឌីតបាននិយាយថា អ្នកធ្វើធម្មយាត្រាជាង ១,៦ លាននាក់បានមកដល់រួចហើយសម្រាប់ធម្មយាត្រាកាលពីថ្ងៃអាទិត្យ (២៥ មិថុនា) ទោះបីជាការប្រមូលផ្តុំនេះ​ចាប់​ផ្តើមជា​ផ្លូវការ​នៅថ្ងៃអង្គារក៏ដោយ។ អារ៉ាប៊ីសាអូឌីតកំពុងរៀបចំពិធីទទួលក្រុមអ្នកធ្វើធម្មយាត្រាប្រហែល ២,៦ លាននាក់សម្រាប់រដូវកាលហាជី ឆ្នាំ២០២៣ បន្ទាប់ពីបានលុប​ចោល​​ការរឹតបន្តឹង​ទាំងអស់ នៃជំងឺកូវីដ១៩ ជាលើកដំបូងចាប់តាំងពីឆ្នាំ២០១៩មក៕