​រដ្ឋមន្ត្រី​ការពារ​ជាតិចិន លោក Li Shangfu បាន​និយាយ​កាលពី​ថ្ងៃ​អង្គារ (​ទី​២៧ ខែមិថុនា​) ថា ប្រទេស​ចិន​មាន​ឆន្ទៈ​ក្នុងការ​ធ្វើការ​ជាមួយ​ប្រទេស​វៀតណាម ដើម្បី​ពង្រឹង​ទំនាក់ទំនង និង​កិច្ចសហប្រតិបត្តិការ​កម្រិត​ខ្ពស់ រវាង​យោធា​របស់​ប្រទេស​ទាំង​២​។​

​ក្រសួងការពារជាតិ​ចិន បាន​ឲ្យ​ដឹង​នៅក្នុង​សេចក្តីថ្លែងការណ៍​មួយ​ថា នៅក្នុង​កិច្ចប្រជុំ​របស់​ភាគី​នៃ​ប្រទេស​ទាំង​២ នៅ​ទីក្រុង​ប៉េកាំង លោក Li បាន​និយាយថា ស្ថានភាព​អន្តរជាតិ​មាន​ភាពវឹកវរ និង​ជំពាក់​វា​ក់វិន​គ្នា ហើយ​សន្តិសុខ​នៃ​តំបន់​អាស៊ី​ប៉ាស៊ីហ្វិក កំពុង​ប្រឈម​នឹង​បញ្ហា​។​

​លោក Li បាន​និយាយ​នៅក្នុង​កិច្ចពិភាក្សា​ជាមួយ​រដ្ឋមន្ត្រី​ក្រសួងការពារជាតិ​វៀតណាម​លោក Phan Van Giang ( ផាន វ៉ាន់​សាង​) ថា​៖ «​ប្រទេស​ចិន និង​វៀតណាម គួរតែ​បន្ត​ធ្វើការ​រួមគ្នា និង​រួបរួមគ្នា​យ៉ាង​ជិតស្និទ្ធ ក្នុង​ដំណើរ​ដ៏​វែងឆ្ងាយ​ថ្មី​របស់​ប្រជាជាតិ​សង្គមនិយម ការពារ​ផលប្រយោជន៍​យុទ្ធសាស្ត្រ​រួម​របស់​ប្រទេស​ទាំងពីរ និង​រួមចំណែក​ជា​វិជ្ជមាន​ដល់​សន្តិភាព និង​ស្ថិរភាព​ក្នុង​តំបន់​។​

​លោក Li បាន​ប្រា​ប់លោក Phan ថា ទំនាក់ទំនង​រវាង​យោធា​របស់​ប្រទេស​ទាំង​២ មានការ​វិវឌ្ឍន៍​ទៅ​យ៉ាង​ល្អប្រសើរ ដោយ​លោក​បាន​បន្ថែមថា យោធា​របស់​របស់​ប្រទេស​ចិន មាន​ឆន្ទៈ​ជំរុញ​ទំនាក់ទំនង​ឲ្យ​ទៅដល់​កម្រិត​ថ្មី​មួយ​។​

​កិច្ចប្រជុំ​របស់​ភាគី​ទាំង​២ បាន​ធ្វើឡើង​បន្ទាប់ពី​នាវា USS Ronald Reagan បាន​ចូល​ចត​នៅ​កំពង់ផែ​ទីក្រុង Danang របស់​វៀតណាម កាលពី​ថ្ងៃអាទិត្យ (​ទី​២៥ ខែមិថុនា​) ដោយ​នេះ​ជាការ​ឈប់​ចត​លើក​ទី​៣ របស់​នាវា​ផ្ទុក​យន្តហោះ​សហរដ្ឋអាមេរិក គិត​ចាប់តាំងពី​បញ្ចប់សង្គ្រាម​វៀតណាម​៕​