ក្រុមអ្នកវិភាគ បាននិយាយថា ក្រុមហ៊ុន Tesla នឹងត្រៀមឈានដល់ការលក់បានកម្រិតខ្ពស់បំផុតប្រចាំត្រីមាសម្ដងទៀតរបស់ខ្លួន នៅប្រទេសចិន ខណៈពេលដែលក្រុមហ៊ុនប្រឈម​នឹង​សម្ពាធ​កាន់តែខ្លាំងពីដៃគូប្រកួតប្រជែងក្នុងស្រុក ដូចជាក្រុមហ៊ុន BYD ដែលកំពុងតែដណ្ដើមយកចំណែកទីផ្សាររបស់ខ្លួន ក្នុងអាជីវកម្មលក់រថយន្តដ៏ធំបំផុតរបស់ពិភពលោកនេះ។

យោងតាមការប៉ាន់ប្រមាណពីលោក Shi Ji អ្នកវិភាគរបស់ធនាគារ Merchants Bank International Securities នៅប្រទេសចិន បានឲ្យដឹងថា ក្រុមហ៊ុនផលិតរថយន្ត​របស់សហរដ្ឋអាមេរិក​មួយ​នេះ អាចលក់រថយន្តបានចំនួន ១៥៥.០០០គ្រឿង នៅចិន ក្នុងអំឡុងពីខែមេសា ដល់ខែមិថុនា ពោលគឺកើនឡើង ១៣ភាគរយ បើធៀបនឹងការលក់នៅត្រីមាសទី១របស់ក្រុមហ៊ុន។

តែទោះជាយ៉ាងណាក៏ដោយ លោក Shi បានបន្ថែមថា ចំណែកទីផ្សាររបស់ក្រុមហ៊ុន Tesla នៅក្នុងទីផ្សាររថយន្តអគ្គិសនីប្រើអាគុយរបស់ចិន នឹងធ្លាក់ចុះនៅក្នុងត្រីមាសនេះ មកត្រឹម ១៣,៧ភាគរយ ពី ១៦ភាគរយ ក្នុងរយៈពេល ៣ខែដំបូង ខណៈដែលរថយន្ត BYD និង Aion ដែលជារថយន្តអគ្គិសនី (EV) របស់ក្រុមហ៊ុន Guangzhou Automobile Group ដណ្ដើម​បាន​ចំណែក​ទីផ្សារ។

ក្រុមហ៊ុន Tesla នឹងប្រកាសពីចំនួនលក់ជាសកលនៅចុងសប្តាហ៍នេះ ខណៈការលក់នៅប្រទេសចិន នឹងមានពីទិន្នន័យរួមបញ្ចូលគ្នា ក្នុងសប្តាហ៍ទី១ នៃខែកក្កដា។ ប្រទេសចិនគឺជាទីផ្សារ​ធំបំផុត​ទី២ របស់ក្រុមហ៊ុន Tesla បន្ទាប់ពីអាមេរិកខាងជើង និងជាទីតាំងរោងចក្រដ៏ធំបំផុតរបស់ក្រុមហ៊ុន៕