ក្រុមអ្នកការទូតបាននិយាយ កាលពីថ្ងៃអង្គារ (ទី២៧ ខែមិថុនា) ថា បេសកកម្មរក្សាសន្តិភាពរបស់អង្គការសហប្រជាជាតិ ឬUN ដែលមានរយៈពេលមួយទសវត្សរ៍ នៅក្នុងប្រទេសម៉ាលី ត្រៀមនឹងបញ្ចប់នៅថ្ងៃទី៣០ ខែមិថុនានេះ ពោលគឺនៅមុនពេលការបោះឆ្នោតក្រុមប្រឹក្សាសន្តិសុខលើពង្រាងសេចក្តីសម្រេចដែលត្រូវបានឃើញដោយសារព័ត៌មាន Reuters ដែលនឹងផ្តល់រយៈពេល ៦ខែ ដល់កងកម្លាំងចំនួន ១៣.០០០នាក់ឲ្យដកចេញ។

គម្រោងនៃការបញ្ចប់បេសកកម្មរក្សាស្ថិរភាពសមាហរណកម្មពហុភាគីរបស់អង្គការសហប្រជាជាតិ នៅប្រទេសម៉ាលី (MINUSMA) កើតមានឡើងបន្ទាប់ពីមានភាពតានតឹងអស់ជាច្រើនឆ្នាំ រវាង UN និងរបបយោធាម៉ាលី ដែលបានឈានមកដល់ចំណុចបញ្ចប់ នៅខែនេះ នៅពេលដែលរដ្ឋមន្ត្រីការបរទេសម៉ាលី លោក Abdoulaye Diop បានស្នើឲ្យកងកម្លាំងចាកចេញ «ដោយគ្មានការពន្យារពេល»។

នេះនឹងរៀបចំឲ្យមានការបញ្ឈប់ភ្លាមៗ ចំពោះប្រតិបត្តិការមួយដែលត្រូវបានធ្វើឲ្យរអាក់រអួល ដោយការរឹតបន្តឹងរបស់រដ្ឋាភិបាល ចាប់តាំងពីប្រទេសម៉ាលី បានសហការជាមួយក្រុមទាហានស៊ីឈ្នួល Wagner របស់ប្រទេសរុស្ស៊ី ក្នុងឆ្នាំ២០២១។ បេសកកម្មរបស់អង្គការសហប្រជាជាតិ ឬUN ត្រូវបានគេសរសើរថា បានដើរតួនាទីយ៉ាងធំធេង ក្នុងការជួយការពារជនស៊ីវិល ប្រឆាំងនឹងការបះបោរអ៊ីស្លាម ដែលបានសម្លាប់មនុស្សរាប់ពាន់នាក់។

តាមអត្ថបទនៃសេចក្ដីព្រាងនោះ MINUSMA នឹងមានពេលរហូតដល់ថ្ងៃទី៣១ ខែធ្នូ ដើម្បីធ្វើការដកចេញ «តាមលំដាប់លំដោយ និងសុវត្ថិភាព» ដែលក្រុមប្រឹក្សាសន្តិសុខ នឹងពិនិត្យឡើងវិញ នៅថ្ងៃទី៣០ ខែតុលា។ បន្ទាប់មក ប្រសិនបើចាំបាច់ ក្រុមប្រឹក្សាអាចពិចារណាលើការកំណត់ពេលវេលាដែលបានកែសម្រួលក្នុងកិច្ចពិភាក្សាជាមួយប្រទេសម៉ាលី៕