​បាល់ទាត់៖ លោក Oleg Starynskyi​ គ្រូ​បង្វឹក​ក្រុម​ភ្នំពេញ​ក្រោ​ន ​បាន​សម្ដែង​ការ​ខក​ចិត្តដែល​ក្រុម​ខ្លួន​មាន​ការ​ប្រកួត​តិច បន្ទាប់ពី​ការប្រកួត​ក្រប​ខណ្ឌ​លី​គ​កំពូល​កម្ពុជាត្រូវ​ត្រឡប់មកវិញនា​ចុង​សប្ដាហ៍​នេះ។

​ការ​លើក​ឡើង​របស់​គ្រូ​បង្វឹក​សញ្ជាតិ​អ៊ុយ​ក្រែ​ន​នេះ បន្ទាប់ពី​គណៈកម្មការ​ប្រកួត​បាល់​ទាត់​ជាតិ​កម្ពុជា​-CNCC និង​ក្លិប​ជា​សមាជិក​បាន​ប្រជុំ​ពិភាក្សា និង​រៀបចំ​កាលវិភាគ​ប្រកួត​ថ្មី ខណៈ​ការប្រកួត ៣​សប្ដាហ៍​ដំបូងសុទ្ធ​តែ​ជា​ការប្រកួត​បង្គ្រប់​សប្ដាហ៍ មុន​បន្ដ​ផ្អាក​ការប្រកួត​ជាង ១​ខែ ដោយសារ​ក្រុម​ជម្រើស​ជាតិ​កម្ពុជា ត្រូវ​ចូលរួម​ប្រកួត​ជម្រុះ​ពានរង្វាន់ FIFA World Cup 2022 នៅ​បា​រ៉ែ​ន ហើយ​ក្រុម​វិសាខា និង​បឹងកេតត្រូវ​ចូលរួម​ប្រកួត​ពានរង្វាន់ AFC Cup 2021 នា​អំឡុង​ខែ​មិថុនា។​ ​លោក Oleg បាន​និយាយ​ថា ក្រុម​របស់​ខ្លួន​ចង់​មានការ​ប្រកួត​បន្ថែម​ទៀត ព្រោះ​ភ្នំពេញ​ក្រោ​ន បាន​ចាប់ផ្ដើម​ការប្រកួត Pre-Season នៅ​ចុងខែ​វិច្ឆិកា តែ​មក​ទល់​ពេល​នេះពួកគេ​ទើប​ប្រកួត​ផ្លូវការ​បាន ៣​ប្រកួត​ប៉ុណ្ណោះ។ ហេតុនេះលោក​ពិតជា​ខកចិត្តចំពោះ​ខែ​ឧសភា និង​ខែ​មិថុនា ដែល​ភ្នំពេញ​ក្រោ​ន និង ៥​ក្រុម​ផ្សេងទៀតលេង​បានតែ ១​ប្រកួត ពោល​គឺ​ភ្នំពេញ​ក្រោ​នត្រូវ​បើកទ្វារ​ផ្ទះ​ទទួល​ខេត្ត​ព្រៃវែង ក្នុង​ជំនួប​ង្គ្រ​ប់​សប្ដាហ៍​ទី​៣ នា​ថ្ងៃ​ទី​២២ ខែ​ឧសភា​ខាងមុខនៅ​កីឡដ្ឋាន Smart RSN។​

​គ្រូ​បង្វឹក​ធ្លាប់​ដឹកនាំ​ភ្នំពេញ​ក្រោ​នលេង​វគ្គ Play-Off នៃ​ពានរង្វាន់ AFC Cup 2016 ដដែល​បន្ដ​ថា តាម​គំនិត​របស់​ខ្លួនកាលវិភាគ​ប្រកួត​លី​គគួរ​តែ​រៀបចំ​របៀប​ផ្សេង​ពី​នេះ ដែល​ធ្វើ​ឲ្យ​ក្រុម​ខ្លួន​អាច​លេង​បាន ២ ទៅ ៣​ប្រកួតក្នុង​ខែ​ឧសភា ដ្បិត​ក្រុម​ជម្រើស​ជាតិ​ត្រូវ​លេង​នា​ខែ​មិថុនា។ ការ​លើក​ឡើង​នេះព្រោះ​លោក​យល់ថា ការប្រកួត​លី​គគឺមាន​ការប្រកួតប្រជែង​ខ្ពស់​ណាស់ ពិសេស​ក្រុម​ចំនួន ៦ ទៅ ៧ សុទ្ធតែ​មានឱកាស​ដណ្ដើម​ពាន ប៉ុន្តែ​ចំនួន​ការប្រកួតនៅ​មិនទាន់​គ្រប់គ្រាន់​នោះ​ទេ។​ ​គួរ​បញ្ជាក់​ថា ក្រុម​សិង្ហ​ក្រហម​ភ្នំពេញ​ក្រោ​នបាន​ឆ្លងកាត់ ៣​ប្រកួតមុន​លី​គ​ផ្អាក​ការប្រកួត​បណ្ដោះអាសន្ន ដោយសារ​ការ​រីក​រាល​ដាល​ខ្លាំងនៃ​ជំងឺ​កូ​វីដ​-១៩ ជាមួយ​លទ្ធផល​ឈ្នះ ៣​ប្រកួត​ផ្ទួនៗដើម្បី​ទទួល​បាន ៩​ពិន្ទុ​ពេញ ដូច​ក្រុម​ព្រះខ័ន​រាជ​ស្វាយរៀង​ដែរ តែ​ចាញ់​ប្រៀប​ក្រុម​អង្គ​រថា​យ​ហ្គឺ​រ ១​ពិន្ទុ ដ្បិត​ក្រុម​មាន​មូលដ្ឋាន​នៅ​ខេត្ត​សៀមរាប​នេះបាន​ឆ្លងកាត់ ៤​ប្រកួត​ឈ្នះ​៣ និង​ស្មើ១ រក​បាន ១០​ពិន្ទុ៕

​អត្ថបទ៖ លី ឈុន​ឡា