អាមេរិក ៖ នាវាទេសចរណ៍ដ៏ធំបំផុតរបស់ពិភពលោកឈ្មោះ Icon of the Seas បានចេញដំណើរលើកដំបូងជាផ្លូវការ បន្ទាប់ពីបានបញ្ចប់ការសាកល្បងក្នុងសមុទ្រលើកដំបូងរបស់ខ្លួននៅទីក្រុង Turku ប្រទេសហ្វាំងឡង់ កាលពីថ្ងៃទី ២២ ខែមិថុនា។ យោងតាមរបាយការណ៍បានឱ្យដឹងថា នាវា Icon of the Seas របស់ក្រុមហ៊ុន Royal Caribbean International មួយនេះ គឺជានាវាទេសចរណ៍ខ្នាតយក្សប្រវែង៣៦៥ម៉ែត្រ និងមានទម្ងន់ប្រហែល២៥០.៨០០តោន។

នាវានេះអាចផ្ទុកអ្នកដំណើរបានប្រហែល៥.៦១០នាក់ និងសមាជិកនាវិក២.៣៥០នាក់។

យោងរបាយការណ៍ត្រូវផ្សព្វផ្សាយជាទូទៅ ក្រុមអ្នកឯកទេសជាង៤៥០នាក់ បានធ្វើតេស្តបឋម​រយៈពេល៤ថ្ងៃ​នៅលើផ្នែកខាងមុខរបស់នាវា ក្បាលម៉ាស៊ីន ស្លាបចក្រ រួមជាមួយការត្រួតពិនិត្យកម្រិតរំញ័រ និងសំលេងរំខាន។ បន្ទាប់ពីការធ្វើតេស្តបឋមរួច នាវានោះ បានត្រឡប់ទៅទីតាំងផលិតនាវា Meyer Turku របស់ហ្វាំងឡុង​វិញ​ ហើយវាក៏​ត្រូវបានគ្រោងឱ្យបង្ហាញខ្លួនជាលើកដំបូងនៅរដ្ឋហ្វ្លរីដា ភាគខាងត្បូង សហរដ្ឋអាមេរិកនៅខែមករាឆ្នាំ២០២៤ផងដែរ៕