រុស្ស៊ី ៖ យោងតាមប្រភពដែលត្រូវបានដកស្រង់សម្ដីដោយសារព័ត៌មាន Moscow Times និងអ្នកសរសេរ​ប្លុករបស់យោធារុស្ស៊ី មានសេចក្ដីរាយការណ៍ថា អាជ្ញាធររុស្ស៊ី បានឃុំខ្លួនលោកឧត្តមសេនីយ៍ Sergei Surovikin អគ្គមេបញ្ជាការរងនៃប្រតិបត្តិការយោធារុស្ស៊ី នៅក្នុងប្រទេសអ៊ុយក្រែន ចំពេលមានការរាយការណ៍​ពីការបោសសម្អាតមន្ត្រីយោធា បន្ទាប់ពីមានការបះបោររយៈពេលខ្លី ដោយកងកម្លាំងទាហានស៊ីឈ្នួល Wagner។

ដោយដកស្រង់ប្រភព២ ដែលជិតស្និទ្ធនឹងក្រសួងការពារជាតិរុស្ស៊ី ការិយាល័យនៃសារព័ត៌មានជាភាសារុស្សី «Moscow Times» កាលពីថ្ងៃពុធ (ទី២៨ ខែមិថុនា) បានរាយការណ៍ថា លោក Surovikin ត្រូវបានចាប់ខ្លួន តាមអ្វីដែលប្រភព​មិនបញ្ចេញឈ្មោះម្នាក់ ក្នុងចំណោមប្រភពទាំង២ ប្រាប់ឲ្យដឹង ដោយសារកំពុងជ្រើសរើសប្រធាន​របស់ក្រុមទាហាន​ស៊ីឈ្នួល Wagner លោក Yevgeny Prigozhin ក្នុងអំឡុងពេលបះបោរ។

យោងសារព័ត៌មាន Moscow Times អ្នកសរសេរប្លុកយោធារុស្ស៊ីម្នាក់ឈ្មោះ Vladimir Romanov ក៏បានរាយការណ៍​ពីការចាប់ខ្លួនលោក Surovikin កាលពីថ្ងៃពុធផងដែរ ខណៈពេលដែលវិទ្យាស្ថានស្រាវជ្រាវ សម្រាប់ការសិក្សា​ស្រាវជ្រាវពីសង្គ្រាម (ISW) ដែលមានមូលដ្ឋាននៅទីក្រុងវ៉ាស៊ីនតោនឌីស៊ីសហរដ្ឋអាមេរិក បានរាយការណ៍ពី​ប្រភពរបស់រុស្ស៊ីមួយផ្សេងទៀត ដែលអះអាងថា សម្ព័ន្ធមិត្តយោធារបស់លោក Surovikin ត្រូវបានចោទប្រកាន់ថា បានចូលរួមគំនិតឲ្យមានការបះបោរ។

តែយ៉ាងណាក្ដី សារព័ត៌មាននេះ បានឲ្យដឹងថា ក្រសួងការពារជាតិរុស្ស៊ី នៅមិនទាន់ចេញមកធ្វើសេចក្ដីអត្ថាធិប្បាយ​អ្វីនោះឡើយ ពាក់ព័ន្ធនឹងសេចក្ដីរាយការណ៍ពីការចាប់ឃុំខ្លួនលោក Surovikin នេះ៕