កំពង់ធំ៖បណ្តាពលរដ្ឋ នៅស្រុកតាំងគោក និងស្រុកបារាយណ៍ របស់ខេត្តកំពង់ធំ នៅថ្ងៃទី២៩ ខែមិថុនានេះ បានត្រៀមខ្លួនរួចរាល់ថានឹងចូលរួមគាំទ្រហែបក្ស ក្នុងយុទ្ធនាការឃោសនា​បោះឆ្នោត​ជ្រើសតាំងតំណាងរាស្ត្រនីតិកាលទី៧ ចាប់ពីថ្ងៃទី១ ​ខែកក្កដា ខានស្អែកនេះ ដើម្បីបំផុស​មហាជន​ចូលរួមបោះឆ្នោតទាំងអស់គ្នា ​ដើម្បីជ្រើសរើសមេដឹកនាំប្រទេសដែលគេស្រឡាញ់ពេញចិត្ត ឲ្យបន្តសាងសុខសន្តិភាព ​ការអភិវឌ្ឍ ​និងរីកចម្រើន។

ពលរដ្ឋ ស្រុកតាំងគោកថ្លែងថា ប្រទេសកម្ពុជា បច្ចុប្បន្នមានការអភិវឌ្ឍរីកចម្រើនលើគ្រប់វិស័យ ជាពិសេស ​ការរីកចម្រើន អគារសំណង់ហេដ្ឋារចនាសម្ព័ន្ធ ផ្លូវថ្នល់ ​ផ្លូវល្បឿនលឿន​ ប្រឡាយទឹក សាលារៀន មន្ទីរពេទ្យ និងការជំរុញសេដ្ឋកិច្ច ​ជីវភាពរបស់ពលរដ្ឋបន្តការរីកចំរើនហើយ ​នៅថ្ងៃទី១ ខែកក្កដានេះ ​ពលរដ្ឋនឹងចូលរួមហែបក្ស ឃោសនាបោះឆ្នោតជ្រើសតាំងតំណាងរាស្ត្រនីតិកាលទី៧ ប្រកាសឲ្យពលរដ្ឋបំពេញសិទ្ធិ​កាតព្វកិច្ច​របស់ខ្លួនទៅបោះឆ្នោតទាំងអស់គ្នា ដើម្បីជ្រើសរើស​មេដឹកនាំប្រទេសចាស់ទុំផ្នែកខាងនយោបាយ ​ឲ្យបន្តសាងសុខសន្តិភាព ​អភិវឌ្ឍន៍​ បន្តការរីកចំរើន។

តាមសេចក្តីអំពាវនាវ​របស់គណៈកម្មាធិការជាតិរៀបចំការបោះឆ្នោត គ.ជ.ប បាន​ឲ្យ​ដឹងថា យុទ្ធនាការ​ឃោសនាបោះឆ្នោតជ្រើសតាំងតំណាងរាស្ត្រនីតិកាលទី៧​ នឹងធ្វើឡើងរយៈពេល២១ថ្ងៃ ចាប់ពីថ្ងៃទី១ ​ដល់ថ្ងៃទី២១ ខែកក្កដា​ ឆ្នាំ២០២៣​ ហើយ​បណ្តា​គណបក្ស​នយោបាយនានា​ចំនួន​១៨គណបក្សនយោបាយ នឹង​ធ្វើការ​ផ្សព្វផ្សាយ​កម្មវិធី​នយោបាយ​របស់ខ្លួន​ជូន​អ្នកបោះឆ្នោត​ជា​សាធារណៈឲ្យគាំទ្រខ្លួន៕ អត្ថបទ ស៊ុម សុខជា