ប្រទេសប៉ូឡូញ ទទួលបានរថក្រោះ Abrams របស់សហរដ្ឋអាមេរិកចំនួន ១៤គ្រឿងដំបូង កាលពីថ្ងៃពុធ (ទី២៨ ខែមិថុនា) ដែលនេះជាការទទួលបានចំណែក នៃកិច្ចព្រមព្រៀងជាមួយ​ទីក្រុង​វ៉ាស៊ីនតោន ដែលបានចុះហត្ថលេខា នៅឆ្នាំ២០២២។

ទីក្រុងវ៉ាសូវីបានបញ្ជាទិញរថក្រោះប្រយុទ្ធដ៏ទំនើប Abrams ចំនួន ២៥០គ្រឿង បន្ថែមលើរថក្រោះ ១១៦គ្រឿង ដែលត្រូវបានកែប្រែជួសជុលឲ្យកាន់តែទំនើប ខណៈ​ដែល​ប្រទេស​នៅតំបន់​អឺរ៉ុបមួយនេះ កំពុងស្វះស្វែងរកការពង្រឹងផ្នែកយោធារបស់ខ្លួន ក្នុងកិច្ចប្រឹងប្រែង ដើម្បីទប់ស្កាត់ការលុកលុយរបស់រុស្ស៊ី ដែលមានសក្តានុពល នៅតាមព្រំដែនភាគខាងកើតរបស់ខ្លួន។

ថ្លែងនៅក្នុងទីក្រុង Szczecin (ស៊ូឆេឈីន) ជាកន្លែងដែលរថក្រោះត្រូវបានបញ្ជូនមកដល់ រដ្ឋមន្ត្រីក្រសួងការពារជាតិប៉ូឡូញ លោក Mariusz Blaszczak ( ម៉ារីឣូស ប្លាស់ហ្សាក់) បាន​និយាយថា ទាហានមកពីកងពលថ្មើរជើងបំពាក់ដោយរថពាសដែកទី១៨ របស់កងទ័ពប៉ូឡូញ ត្រូវបានបណ្តុះបណ្តាលរួចហើយដោយកងទ័ពសហរដ្ឋអាមេរិក ដើម្បីប្រតិបត្តិការ​រថក្រោះទាំងនេះ។

លោក Blaszczak បាននិយាយថា៖ «ពួកគេ (បេឡារុស) នឹងបិទច្រកទ្វារប្រេស (Brest) ជាតំបន់ដីដែលលាតសន្ធឹងពីភាគខាងកើតយ៉ាងឆ្ងាយរហូតដល់ទន្លេវីស្តូឡា (Vistula) ហើយ​ភារ​​កិច្ចរបស់យើង គឺបិទច្រកទ្វារនេះ និងរារាំងអ្នកលុកលុយ ពោល គឺធ្វើឲ្យអ្នកលុកលុយមិនអាចចូលមកក្នុងដីប៉ូឡូញបាន»។

ការបញ្ជូនរថក្រោះនេះ កើតមានឡើងនៅចំពេលដែលមានការបារម្ភពីរដ្ឋសម្ព័ន្ធភាពណាតូមួយចំនួនអំពីការមកដល់ប្រទេសបេឡារុសរបស់លោក Yevgeny Prigozhin ដែលជាមេដឹក​នាំ​​ក្រុម​ទាហានស៊ីឈ្នួល Wagner របស់រុស្ស៊ី បន្ទាប់ពីរូបលោកដឹកនាំការបះបោរមិនបានសម្រេច៕