មិនដូចគ្នាកាលពីឆ្នាំមុននោះទេ លោក Hassan Yassin al-Redhiដែលជាជនជាតិស៊ូដង់មួយរូប​មិនអាចផ្ញើប្រាក់ជូនគ្រួសាររបស់​លោកដែលនៅក្នុងប្រទេសស៊ូដង់​ញាំញីដោយ​ភ្លើង​សង្រ្គាមបាននោះទេ ដើម្បីឲ្យពួកគេ ទិញចៀមសម្រាប់ធ្វើពិធីបុណ្យសាសនា Eid។ លោកបានព្យាយាមទាក់ទងទៅកាន់សាច់ញាតិរបស់លោកតាមទូរស័ព្ទ តែលោកទាក់ទងពុំបានឡើយ ក្រោយចូលរូមពិធីបួងសួងនៅថ្ងៃដំបូងនៃពិធីបុណ្យ Eid al-Adha នៅក្នុងរដ្ឋធានីបាដាដ ប្រទេសអ៊ីរ៉ាក់ ជាកន្លែងដែលលោករស់នៅអស់រយៈពេលជាច្រើនឆ្នាំមកហើយ និងលក់ទឹកផ្លែឈើនៅក្នុងផ្សារ ។

លោក Redhi និយាយថា ពេលដែលពួកយើងនិយាយគ្នាតាមទូរស័ព្ទ ពួកយើងមិនអាចយល់អ្វីទាំងអស់ ដោយសារតែការភ្ជាប់សេវាពិតជាខ្សោយខ្លាំងណាស់ ហើយការទូរស័ព្ទ​តែងតែដាច់​ទំនាក់​ទំនងទៀត ។ ដូចគ្នានឹងជនជាតិស៊ូដង់ផ្សេងទៀតដែរ ដែលរស់នៅ និងធ្វើការនៅក្នុងតំបន់មជ្ឈិមបូព៌ា លោក Redhiបានត្រឹមតែមើលឃើញពីចម្ងាយ​នូវអំពើហិង្សាឆាប​ឆេះនៅ​ក្នុង​ប្រទេសកំណើតរបស់លោក។ 

ដោយឡែក លោក Abdalbagi Osman Abdalbagiវ័យ ៣៣ឆ្នាំ គឺជាជនជាតិស៊ូលដង់មួយរូបទៀត ដែលរស់នៅ និងធ្វើការនៅប្រទេសលីបង់ អស់រយៈពេល ៥ឆ្នាំ និយាយថា អ្នកព្រួយ​បារម្ភពីគ្រួសាររបស់អ្នក ស្ថានភាពរបស់ពួកគេ ទ្រព្យសម្បត្តិរបស់ពួកគេ និងផ្ទះរបស់ពួកគេ។ លោក Abdalbagi បន្តថា លោកគ្មានចំណង់បរិភោគនោះទេសម្រាប់ពិធីបុណ្យ Eid ក្នុង​ឆ្នាំ​នេះ ដោយសារតែគ្មានប្រាក់ ឬសមត្ថភាពផ្លូវចិត្តប្រារព្ធពិធី ស្របពេលដែលលោកព្រួយបារម្ភដល់ប្រជាជននៅក្នុងប្រទេសស៊ូដង់។ លោកថា គ្រួសាររបស់លោក បានជាប់​ខ្លួន​នៅក្នុងប្រទេសស៊ូដង់ ជាប់ព្រំដែនអេហ្ស៊ីប៕