តាកែវ ៖ បងប្អូនប្រជាពលរដ្ឋ រស់នៅភូមិក្រំាងធ្នង់ ឃុំក្រាំងធ្នង់ ស្រុកបាទី ខេត្តតាកែវ បានត្រៀមខ្លួន និងឯកសាររួច ជាស្រេចដើម្បីទៅចូលរួមបោះឆ្នោតជ្រើសរើសតំណាងរាស្រ្តអាណត្តិទី៧ ដែលនឹងប្រព្រឹត្តទៅនាថ្ងៃទី២៣ ខែកក្កដា ឆ្នាំ២០២៣ខាងមុខនេះ ខណៈពួកគាត់នឹងបោះជូនដល់គណបក្សណាដែលដឹកនាំឲ្យប្រទេស មានសុខសន្តិភាព និងការអភិវឌ្ឍប្រទេសដូចសព្វថ្ងៃនេះ។

តាមរយៈកិច្ចសម្ភាសន៍ជាមួយទូរទស្សន៍ BTVបងប្អូនប្រជាពលរដ្ឋទាំងនោះបានលើកឡើងថា ក្នុងនាមពួកគាត់​ជាប្រជាជនខ្មែរ ពួកគាត់នឹងបំពេញកតព្វកិច្ចជាពលរដ្ឋល្អនឹងទៅចូលរួមបោះឆ្នោត ដោយមិនស្តាប់តាមការញុះញង់​អុចអាលរបស់ក្រុមទុច្ចរិតណានោះទេ ហើយពួកគាត់អះអាងទៀតថា នឹងបោះ ឆ្នោតជូនដល់គណបក្ស​ប្រជាជនកម្ពុជា ពីព្រោះគណបក្សនេះក្រោមការដឹកនាំរបស់សម្តេចតេជោ ហ៊ុន សែន បានដឹកនាំឲ្យប្រទេស​មានសុខសន្តិភាព និងការអភិវឌ្ឍជាបន្តបន្ទាប់នោះ។

​បងប្អូនប្រជាពលរដ្ឋទាំងនោះបានលើកឡើងទៀតថា ការដែលពួកគាត់បោះឆ្នោតជូនដល់គណ បក្សប្រជាជនកម្ពុជា គឺដោយសារតែគណបក្សប្រជាជនកម្ពុជា បានដឹកនាំប្រទេសធ្វើឲ្យពួកគាត់ផ្លាស់ប្តូរពី ការដើរមកមានម៉ូតូឡានជិះ ពីផ្លូវហុយមកជាផ្លូវបេតុង និងកៅស៊ូ ពីពេទ្យតាមផ្ទះមកមានមណ្ឌលសុខភាព និងមន្ទីរពេទ្យ។ ជាងនេះទៅទៀតនោះគឺបានដឹកនាំប្រទេសមានការអភិវឌ្ឍជាបន្តបន្ទាប់ ជាក់ស្តែងដូចស្រុកបាទីនេះតែម្តង មានរោងកាន់តែច្រើនឡើងៗដើម្បីផ្តល់ការងារដល់បងប្អូនកូនចៅរបស់ពួកគាត់បានធ្វើជាប្រចាំនោះ។

បងប្អូនប្រជាពលរដ្ឋទាំងនោះបានលើកឡើងទៀតថា តាមការមើលឃើញរបស់ពួកគាត់ ក្នុងរយៈពេលជាង៤០ឆ្នាំ​មកនេះ គណបក្សប្រជាជនកម្ពុជា បានដឹកនាំប្រទេសជាតិឆ្លងកាត់ឧបសគ្គ និងការលំបាករាប់មិនអស់ រហូតសម្រេចបានសមិទ្ធិជាប្រវត្តិសាស្ត្រ។ ពួកគាត់បន្តទៀតថា បច្ចុប្បន្នកម្ពុជាមានសន្តិភាពពេញលេញ មានការអភិវឌ្ឍគ្រប់វិស័យ ហើយកំពុងបន្តឈានទៅមុខប្រកបដោយភាពជឿជាក់លើមាគ៌ាសន្តិភាព លទ្ធិប្រជាធិបតេយ្យ និងអភិវឌ្ឍឥតឈប់ឈរ ហើយបានចូលរួមដោយស្មើភាព និងស្មើសិទ្ធិរាល់កិច្ចការក្នុងតំបន់ និងអន្តរជាតិផងដែរ។

 តាមរយៈកិច្ចសម្ភាសន៍នោះដែរបងប្អូនប្រជាពលរដ្ឋ រស់នៅភូមិឃុំខាងលើនេះ ក៏បានថ្លែងកោត សរសើរ និងអគុណចំពោះក្រុមការងារគណបក្សប្រជាជនកម្ពុជា ដែលមានការដឹកនាំដោយឯកឧត្តម គី តិច ជាប្រធានក្រុមការងារចុះមូលដ្ឋានឃុំក្រាំងធ្នង់ និងឯកឧត្តម ឈិត បូរ៉ាវុធ អនុប្រធានចុះសួរសុខទុក្ខដល់​បងប្អូនប្រជាពលរដ្ឋនៅតាមខ្នងផ្ទះដោយផ្ទាល់ផងដែរ ហើយមិនតែប៉ុណ្ណោះក្រុមការងារក៏បានផ្តល់ ថវិកាព្យាបាលជំងឺប្រជាពលរដ្ឋ និងឧបត្ថម្ភថវិកាសម្រាប់ជួសជុលផ្លូវ និងបង្កើនបរិយាកាសសប្បាយជូន ដល់បងប្អូនប្រជាពលរដ្ឋនៅឃុំក្រាំងធ្នង់ទាំងមូលផងដែរ៕ អត្ថបទ៖ បាន ចក់​