ភ្នំពេញ ៖ ឯកឧត្តមសាស្រ្តាចារ្យ ម៉ម ប៊ុនហេង រដ្ឋមន្រី្តក្រសួងសុខាភិបាល បានស្នើដល់មន្រី្តសុខាភិបាល​រាជធានី-ខេត្ត​ទាំងអស់ ខិតខំទប់ស្កាត់ នឹងជំងឺឆ្លងនានា និងចុះអប់រំសុខភាពដល់មូលដ្ឋាន​រស់នៅរបស់​ប្រជាពលរដ្ឋបន្ថែមទៀត។

​ការថ្លែងរបស់ឯកឧត្តមសាស្រ្តាចារ្យ ម៉ម ប៊ុនហេង រដ្ឋមន្រី្តក្រសួងសុខាភិបាល យ៉ាងដូច្នេះក្នុងពិធីប្រគល់​ប័ណ្ណ​សរសើររបស់រាជរដ្ឋាភិបាលកម្ពុជា ជូនថ្នាក់ដឹកនាំ និងមន្ត្រីសុខាភិបាល នៃមន្ទីរពេទ្យមិត្តភាពខ្មែរ-សូវៀត មន្ទីរពេទ្យ​មិត្តភាពកម្ពុជា-ចិន និងមនី្ទរពេទ្យកុមារជាតិ នារសៀលថ្ងៃទី២៩ ខែមិថុនា ឆ្នាំ២០២៣នេះ។

ឯកឧត្តម រដ្ឋមន្រី្ត បានលើកឡើងទៀតថា មន្រី្តសុខាភិបាល ក៏ដូចជាគ្រូពេទ្យរាជធានី-ខេត្តទាំងអស់ ត្រូវខិតខំទប់​ស្កាត់ នឹងជំងឺឆ្លងនានា ពិសេសតាមដានជំងឺគ្រុនឈាម ជំងឺផ្តាសាយបក្សីH5N1 និងអប់រំប្រជាពលរដ្ឋអំពីការ​ទុកដាក់ចំណីអាហារ ការបំបៅកូនដោយទឹកដោះម្តាយ ករណីពុលស្រា។ ដូច្នេះសូមលើកទឹកចិត្តឲ្យបងប្អូនគ្រូពេទ្យទាំងអស់ ខិតខំអប់រំប្រជាពលរដ្ឋបន្ថែមទៀត ប៉ុន្ដែករណីជំងឺអេដស៍ក៏​កក្រើកឡើងវិញ។ ដូចនេះយើងត្រូវចុះអប់រំផ្សព្វផ្សាយវិធានការបង្ការ និងការប្រើប្រាស់ស្រោម​អនាម័យនេះជា​ការងារ​ដែលគ្រូពេទ្យទាំងអស់ ត្រូវរំលឹកឡើងវិញ និងស្របពេលដែលរាជរដ្ឋាភិបាល បានខិតខំកសាង​អគារមន្ទីរពេទ្យ មណ្ឌលសុខភាព និងសម្ពោធដាក់ឲ្យដំណើរការមន្ទីរពេទ្យ​ដែលបានសាងសង់រួចរាល់​ហើយផងដែរ។

ជាមួយគ្នានេះដែរ ឯកឧត្តមសាស្រ្តាចារ្យ ម៉ម ប៊ុនហេង ក៏សូមសំដែងនូវការអបអរសាទរជាមួយថ្នាក់ដឹកនាំ និងមន្ត្រីសុខាភិបាលទាំងអស់ ដែលបានទទួលនូវការយកចិត្តទុកដាក់ និងលើកទឹកចិត្តពី​រាជរដ្ឋាភិបាល​ប្រគល់ប័ណ្ណសរសើរ នាពេលនេះ និងសូមពាំនាំនូវការសួរសុខទុក្ខ និងនឹករលឹកដ៏ខ្ពង់ខ្ពស់ពី​សំណាក់​សម្ដេចអគ្គមហាសេនាបតី តេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្ដេចកិត្តិព្រឹទ្ធបណ្ឌិត ជូនលោកជំទាវ ឯកឧត្តម រដ្ឋលេខាធិការក្រសួងសុខាភិបាល ឯកឧត្តម អគ្គនាយក និងអគ្គាធិការ នៃក្រសួង​សុខាភិបាល អស់លោក លោកស្រី ថ្នាក់ដឹកនាំ មន្ត្រីរាជការ និងបុគ្គលិកសុខាភិបាល នៃមន្ទីរពេទ្យជាតិ​ទាំង៣ ដែលមានវត្តមាននៅទីនេះ។

ឯកឧត្តម រដ្ឋមន្រី្ត បានរំលឹកអំពីការងារប្រយុទ្ធនឹងជំងឺកូវីដ-១៩ នាពេលកន្លងមក ដែលប្រទេសកម្ពុជា ត្រូវបាន ពិភពលោកប្រសិទ្ធនាមថា “កម្ពុជា ជាប្រទេសតូច មានបេះដូងធំទូលាយ” ដោយបានគ្រប់គ្រង ឆ្លើយតប ការរាតត្បាតជំងឺកូវីដ-១៩ ដោយជោគជ័យ គឺពិតជាមានមោទនៈភាព ចំពោះការខិតខំប្រឹងប្រែងដ៏អស្ចារ្យ របស់សង្គមជាតិទាំងមូល រួមទាំងជនបរទេសទាំងអស់ ដែលស្នាក់នៅក្នុងប្រទេសកម្ពុជា ហើយសមិទ្ធផល គួរឱ្យកត់សម្គាល់នេះកើតឡើង ក្រោមការដឹកនាំផ្ទាល់ប្រកបដោយគតិបណ្ឌិតរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា តាមរយៈការប្រើប្រាស់កម្លាំង សរុបរបស់ជាតិ និងមានការចូលរួមរបស់សង្គមជាតិទាំងមូល ដែលអាចឱ្យកម្ពុជាបើកដំណើរការឡើងវិញទាំងសកម្មភាពសេដ្ឋកិច្ច និងសង្គមតាំងពីខែវិច្ឆិកា ឆ្នាំ២០២១។ មេរៀនបទពិសោធន៍ទាំងអស់នេះ អាចឱ្យយើងយកឈ្នះលើសមរភូមិកូវីដ-១៩ តែរាជរដ្ឋាភិបាលនៅតែបន្តតាមដានដោយយកចិត្តទុកដាក់ ព្រោះសង្គ្រាមកូវីដ-១៩ មិនទាន់ចប់នៅឡើយ៕ ដោយ ៖ រដ្ឋា