ប្រទេសស្រីលង្កាបានប្រកាសពីផែនការរៀបចំរចនាសម្ព័ន្ធឡើងវិញសម្រាប់បំណុលក្នុងស្រុកដ៏មហាសាលរបស់ខ្លួន នៅថ្ងៃព្រហស្បតិ៍ (ទី២៩ ខែមិថុនា)នេះ ដើម្បីបំពេញតាមគោលដៅដែលបានកំណត់ដោយមូលនិធិរូបិយវត្ថុអន្តរជាតិ (IMF) និងមានបំណងរៀបចំឡើងវិញនូវសេដ្ឋកិច្ចរបស់ខ្លួន ដែលត្រូវបានធ្វើឲ្យរង្គោះរង្គើដោយវិបត្តិហិរញ្ញវត្ថុ។

ទេសាភិបាលធនាគារកណ្តាល បាននិយាយ នៅថ្ងៃព្រហស្បតិ៍នេះថា ប្រទេសស្រីលង្កា កំពុងស្នើសុំឲ្យវិនិយោគិនបរទេស នៅក្នុងមូលបត្របំណុលអធិបតេយ្យអន្តរជាតិរបស់ខ្លួនឲ្យកាត់បន្ថយ៣០ភាគរយ ហើយក៏កំពុងស្វែងរកសម្បទានស្រដៀងគ្នាពីម្ចាស់មូលបត្រប្រាក់ដុល្លារផ្សេងទៀតរបស់ខ្លួន ខណៈដែលខ្លួនកំពុងស្វះស្វែងរកឲ្យមានការរៀបចំរចនាសម្ព័ន្ធបំណុលដ៏មហាសាលរបស់ខ្លួនឡើងវិញ។ 

កង្វះខាតប្រាក់ដុល្លារយ៉ាងខ្លាំងក្លា បានធ្វើឲ្យប្រទេសដីកោះដែលមានប្រជាជនចំនួន ២២លាននាក់ នេះ ធ្លាក់ចូលទៅក្នុងវិបត្តិហិរញ្ញវត្ថុដ៏អាក្រក់បំផុត កាលពីឆ្នាំមុន គិតចាប់តាំងពីទទួលបានឯករាជ្យពីចក្រភពអង់គ្លេស ក្នុងឆ្នាំ១៩៤៨ ដែលបង្កឲ្យមានការខកខានសងបំណុលបរទេសលើកដំបូងរបស់ខ្លួន នៅក្នុងខែឧសភា ឆ្នាំ២០២២។

ដោយបានសន្យាថានឹងធ្វើឲ្យបន្ទុកបំណុលដ៏ធំនេះនៅលើផ្លូវប្រកបដោយនិរន្តរភាព ប្រទេសស្រីលង្កាអះអាងនូវការរៀបចំថវិកាសង្គ្រោះចំនួន ២,៩ពាន់លានដុល្លារពី IMF កាលពីខែមីនា។ ដូច្នេះ សការរៀបចំរចនាសម្ព័ន្ធបំណុលក្នុងស្រុក គឺរឿងចាំបាច់ ដើម្បីជួយឲ្យប្រទេសនេះសម្រេចតាមគោលដៅកម្មវិធីរបស់ IMF ដើម្បីកាត់បន្ថយបំណុលសរុបដល់ទៅ ៩៥ភាគរយនៃផលិតផលសរុបក្នុងស្រុក (GDP) នៅឆ្នាំ២០៣២។

នៅថ្ងៃព្រហស្បតិ៍ (ទី២៩ ខែមិថុនា)នេះ ធនាគារកណ្តាលរបស់ប្រទេសនេះ បានបង្ហាញពីផែនការរៀបចំរចនាសម្ព័ន្ធឡើងវិញ ដែលរួមមានការផ្លាស់ប្តូរប័ណ្ណបំណុលរតនាគារទៅជាមូលបត្ររយៈពេលវែង៕