​បាល់ទាត់៖ ​មាន​មនុស្ស​មិន​ច្រើន​ទេ​នៅលើ​លោក​នេះ ដែល​អាច​បញ្ចុះបញ្ចូល​ឲ្យ​កីឡាករ​លំដាប់​ពិភពលោក​ណា​ម្នាក់ធ្វើការផ្លាស់ប្តូរ ​តែ​ម្តាយ​របស់ Cristiano Ronaldo ប្រហែលជា​អាចធ្វើ​បាន ​ក្នុងការ​នាំមុខ​កូនប្រុស​របស់ខ្លួន​ត្រលប់មក​ក្លិប​ចាស់​វិញ​។

​​លោកស្រី Dolores Aveiro​ បាន​ចូលរួម​អបអរសាទរ​ជ័យជំនះ ​ជើងឯក​លី​គ​កំពូល​ព័រទុយ​ហ្កាល់​របស់ Sporting CP ដែល​ជា​ជើងឯក​លើកដំបូង​រាប់​តាំងពី​ឆ្នាំ​២០០២ ដោយ​លោកស្រី​បាន​និយាយ​ទៅកាន់​អ្នក​គាំទ្រ​ថា លោកស្រី​នឹង​និយាយ​ជាមួយ​កូនប្រុស​របស់​ខ្លួន ​ធ្វើ​យ៉ាង​ណា​ឲ្យ​ត្រលប់​មកកាន់ Sporting វិញ​នៅ​រដូវ​កាល​ក្រោយ​។ ​​ខ្សែប្រយុទ្ធ​វ័យ ៣៦ឆ្នាំ​រូបនេះ​នៅ​សល់​កិច្ចសន្យា​ជាមួយ Juventus ១រដូវ​កាល​ទៀត តែ​អនាគត​របស់ Ronaldo កំពុង​ស្រពិចស្រពិល​នៅឡើយ​ ខណៈ​ពាក្យ​ច​ចាម​អារ៉ាម​ពី​ការផ្លាស់​ចេញ​មាន​ហូរហែ​។ ​​Juventus កំពុង​ឈរ​លេខ៥ នៅ Serie A ហើយក៏​អាច​នឹង​បាត់​មុខ​ពី Champions League ដែរ​នៅ​រដូវ​កាល​ក្រោយ ហើយ​ប្រសិនជា​ពិតមែន​នោះច្បាស់​ណាស់​ថា Ronaldo នឹង​ចាកចេញ​។​

​​ជើងឯក​ព័រទុយហ្កាល់​របស់ Sporting CP នឹងធ្វើ​ឲ្យពួកគេ​បង្ហាញខ្លួន​នៅ Champions League រដូវ​កាល ​ដែលជា​គោលដៅ​អាចទៅរួច​មួយ​សំរាប់ Cristiano Ronaldo​។ ​​​រំលឹក​ថា Sporting CP ជា​ក្លិប​ដំបូង​របស់ Cristiano Ronaldo ដែល​បាន​រួមរស់​តាំង​ពី​ក្មេង ​មុន​ពេល​ដែល​កីឡាករ​វ័យ ៣៦​ឆ្នាំ​រូប​នេះ​ចាប់ផ្តើម​ធ្វើ​ឲ្យ​ពិភពលោក​ភ្ញាក់ផ្អើល​ ក្នុង​ការ​ក្លាយ​ខ្លួនជា​កីឡាករ​លំដាប់​កំពូល​នៅ​ពេល​ផ្លាស់​មកកាន់ Manchester United ហើយ​កាន់តែ​ជោគជ័យ​ទៀត​នោះ​គឺ​អាជីព​នៅ Real Madrid៕

​អត្ថបទ​៖​នាង សុភា​វុ​ធ