ឥណ្ឌា៖  កាលពីថ្ងៃព្រហស្បតិ៍ម្សិលមិញ មេដឹកនាំប្រឆាំងឥណ្ឌា លោក Rahul Gandhiត្រូវបានបញ្ឈប់ដោយក្រុមនគរបាលក្នុងស្រុក ដែលបានបាញ់ឧស្ម័នបង្ហូរទឹកភ្នែកនៅជិតក្បួនរថយន្តរបស់លោក ពេលដែលមេដឹកនាំគណបក្សសភាម្នាក់នេះ ស្ថិតនៅតាមផ្លូវទៅកាន់រដ្ឋភាគឦសាន Manipur ដែលកំពុងកើតអំពើហិង្សា ។ 

គួរឲ្យដឹងថា មនុស្សយ៉ាងហោច ៨០នាក់ ត្រូវបានសម្លាប់ និងមនុស្សជាង ៤ម៉ឺននាក់ បានរត់ភៀសខ្លួនចេញពីផ្ទះសម្បែងរបស់ពួកគេ ចាប់តាំងពីការប៉ះទង្គិចគ្នាផ្ទុះឡើងនៅរដ្ឋ Manipurកាលពីដើមខែឧសភាកន្លងទៅ រវាងក្រុមជនជាតិភាគតិច ។  

ឧបទ្ទេវហេតុហិង្សា និងការលួចដុតផ្ទះសម្បែងជាបន្តបន្ទាប់ នៅតែកើតឡើង បើទោះបីជាមានវត្តមានដ៏ច្រើនរបស់កងកម្លាំងសន្តិសុខក៏ដោយនៅតំបន់មួយចំនួនក្នុងរដ្ឋដាច់ស្រយាលមួយនេះ ដែលជាប់ព្រំដែនជាមួយសហមីយ៉ាន់ម៉ា ។  

លោក Gandhi កំពុងធ្វើដំណើរទៅកាន់ស្រុក Churachandpurគឺជាស្រុកមួយក្នុងចំណោមស្រុកជាច្រើនទៀត ដែលរងផលប៉ះពាល់ខ្លាំងបំផុតដោយសារអំពើហិង្សា ពេលដែលកងកម្លាំងសន្តិសុខ បានបញ្ឈប់ក្បួនរថយន្តរបស់លោកនៅទីក្រុង Bishnupur ដែលមានចម្ងាយប្រហែល ២០គ.មពីទីក្រុង Imphal ដោយសារពួកលើកឡើងពីក្តីកង្វល់សន្តិសុខ ។ 

ឧស្ម័នបង្ហូរទឹកភ្នែក ត្រូវបានបាញ់ដើម្បីបំបែកហ្វូងមនុស្សដែលចាប់ផ្តើមជួបជុំគ្នានៅទីនោះ ។  

សូមបញ្ជាក់ថា អំពើហិង្សារវាងក្រុមជនជាតិភាគតិច Kuki ដែលភាគច្រើនរស់នៅតាមតំបន់ភ្នំ និងក្រុមជនជាតិភាគតិច Meiteis ដែលជាសហគមន៍នៅតាមតំបន់វាលទំនាប បានផ្ទុះឡើងកាលពីថ្ងៃទី ៣ ខែឧសភា ដោយសារតែការមិនសប្បាយចិត្តចំពោះអត្ថប្រយោជន៍សេដ្ឋកិច្ច និងកូតាក្នុងការងាររដ្ឋ ហើយនិងការអប់រំដែលបម្រុងទុកសម្រាប់ប្រជាជនរស់នៅតំបន់ភ្នំ ៕