ភ្នំពេញ៖ នៅសល់ប្រមាណតែ២៤ថ្ងៃទៀតប៉ុណ្ណោះ ការបោះឆ្នោតជ្រើសតាំងតំណាងរាស្ត្រនីតិកាលទី៧ ដែលនឹងឈានចូលមកដល់ បណ្តាពលរដ្ឋនៅខេត្តកណ្តាល បានចាត់ទុកថា ការបោះឆ្នោត ជាការងារស្នូលធំផុត​នៃ​លទ្ធិប្រជាធិបតេយ្យ ​និងមានសារសំខាន់ក្នុងការជ្រើសរើសមេដឹកនាំប្រទេសជាតិ សាង​សុខសន្តិភាព បង្កើនការអភិវឌ្ឍប្រទេសជាតិ ​បន្តការរីចម្រើន។

ពលរដ្ឋ រស់នៅខេត្តកណ្តាល ថ្លែងប្រាប់BTV នៅថ្ងៃទី៣០ ខែមិថុនានេះថា នៅពេលនេះ ពួកគាត់ បានត្រៀមរួចរាល់មានដូចជា អត្តសញ្ញាបណ្ណ​សញ្ជាតិខ្មែរគំរូថ្មី ហើយសម្រាប់អ្នកមិន​មាន​អត្តសញ្ញាណបណ្ណ ​ដោយសារការខូច ឬបាត់ជាដើម ​គឺបានត្រៀម ​ឯកសារបញ្ជាក់អត្តសញ្ញាណ បម្រើការបោះឆ្នោត ដើម្បីបំពេញសិទ្ធ ​កាតព្វកិច្ច ​ទៅបោះឆ្នោតជ្រើសរើស​មេដឹកនាំ​ប្រទេស ដែល​គេស្រឡាញ់ពេញចិត្ត ​នៅក្នុងឱកាសការបោះឆ្នោតសកល ​នៅថ្ងៃទី២៣ ខែកក្កដានេះ ដោយខានមិនបាន។

សូមបញ្ជាក់ថា ក្នុងបញ្ជីឈ្មោះឆ្នោតឆ្នាំ២០២២​ របស់​គណៈកម្មាធិការជាតិរៀបចំការ​បោះឆ្នោត គ.ជ.ប មានពលរដ្ឋខ្មែរមានវ័យចាប់ពី ១៨ឆ្នាំឡើងទៅ ​ដែលត្រូវទៅ​បោះឆ្នោតមានចំនួន​ ៩លាន ៧សែន១០៦៥៥នាក់ ​ក្នុងនោះ ​មានស្រីប្រមាណជាង ​៥លាននាក់ ដែលមានការិយាល័យ​បោះឆ្នោត ២ម៉ឺន៣៧៨៩ការិយាល័យ៕ អត្ថបទ ស៊ុម សុខជា