មន្ត្រីអាមេរិកមួយរូប បានបង្ហើបឲ្យដឹងថា សមាជិកអង្គការណាតូ (NATO) បានឈានដល់កិច្ចព្រមព្រៀងជាបណ្តោះអាសន្ន ដើម្បីស្នើឲ្យអគ្គលេខាធិការលោក Jens Stoltenberg បន្តធ្វើ​ជា​ប្រធាននៃសម្ព័ន្ធភាពយោធាឆ្លងអាត្លង់ទិក ខាងជើងដែលមានសមាជិកចំនួន ៣១ប្រទេសនេះ សម្រាប់រយៈពេលមួយឆ្នាំទៀត។

មន្ត្រីដែលមិនត្រូវបានអនុញ្ញាតឲ្យធ្វើអត្ថាធិប្បាយជាសាធារណៈ និងបាននិយាយក្នុងលក្ខខណ្ឌមិនបញ្ចេញឈ្មោះ បានប្រាប់ថា ការសម្រេចចិត្តនៅតែត្រូវការរៀមចំបញ្ច​ប់​ដោយ​សមាជិក​​របស់​សម្ព័ន្ធភាព។

មន្ត្រីរូបនោះ​បាននិយាយទៀតថា ការសម្រេចដែលមានការរំពឹងទុកយ៉ាងខ្លាំង ក្នុងការស្នើសុំជាផ្លូវ​ការឲ្យលោក Stoltenberg បន្តកាន់តំណែងរបស់លោកសម្រាប់រយ:មួយឆ្នាំទៀតនោះ ត្រូវ​បាន​គេរំពឹងថា នឹងកើតឡើងក្នុងពេលឆាប់ៗនេះ។

សមាជិកណាតូគ្រោងនឹងរៀបចំកិច្ចប្រជុំកំពូលប្រចាំឆ្នាំរបស់ខ្លួន នៅទីក្រុងវីលនីញូស ប្រទេសលីទុយអានី នៅថ្ងៃទី ១១-១២ ខែកក្កដា ហើយមន្ត្រីរូបនោះ បានបន្ថែមទៀតថា ប្រធានា​ធិប​តី​​អា​មេរិក លោក Joe Biden បានប្រាប់លោក Stoltenberg ក្នុងអំឡុងការជួបថ្មីៗនេះរបស់មេដឹកនាំទាំង២ នៅឯសេតវិមានថា ច្បាស់ណាស់ថា នឹងមិនមានការស្របមតិគ្នា​ក្នុងរយៈ​ពេលដ៏ខ្លីក្នុង​រង្វង់​សម្ព័ន្ធមិត្តណាតូលើការជ្រើសរើសមេដឹកនាំអចិន្ត្រៃយ៍ថ្មីនោះឡើយ។

លោក Stoltenberg ដែលជាអតីតនាយករដ្ឋមន្ត្រីប្រទេសន័រវែស បានធ្វើជាមន្ត្រីស៊ីវិលជាន់ខ្ពស់របស់អង្គការណាតូ ចាប់តាំងពីឆ្នាំ២០១៤។ ការបំពេញតួនាទីរបស់លោក គ្រោងនឹង​បញ្ចប់ កាលពីឆ្នាំមុន ប៉ុន្តែត្រូវបានបន្តជាលើកទី២ ដើម្បីបន្តអនុវត្តការគ្រប់គ្រងទៀត បន្ទាប់ពីមានការលុកលុយទាំងស្រុងរបស់ប្រទេសរុស្ស៊ីលើប្រទេសអ៊ុយក្រែន ក្នុងខែកុម្ភៈ ឆ្នាំ​២០២២៕