រដ្ឋជាសមាជិកអង្គការយូណេស្កូមួយចំនួនមានការព្រួយបារម្ភអំពីការយល់ព្រមឱ្យសហរដ្ឋអាមេរិកវិលត្រឡប់ទៅកាន់ទីភ្នាក់ងារវប្បធម៌របស់អង្គការសហប្រជាជាតិវិញ បន្ទាប់ពី​ប្រទេស​នេះ បានដកខ្លួនចេញភ្លាមៗកាលពីខែតុលាឆ្នាំ២០១៧ ខណៈដែលសន្និសីទកំពុងដំណើរការពី​ថ្ងៃព្រហស្បតិ៍ដល់​ថ្ងៃសុក្រនៅទីក្រុងប៉ារីស ដើម្បីសម្រេចថា​តើត្រូវ​ស្វាគមន៍​សហរដ្ឋអាមេរិកម្តងទៀតឬយ៉ាងណា។

សហរដ្ឋអាមេរិក បានដកខ្លួនចេញពីអង្គការអប់រំ វិទ្យាសាស្ត្រ និងវប្បធម៌របស់អង្គការសហប្រជាជាតិ (ហៅកាត់ថា យូណេស្កូ-UNESCO) ចំនួនពីរលើក គឺក្នុងឆ្នាំ១៩៨៤ និងឆ្នាំ២០១៧ ជាបន្តបន្ទាប់។ ចាប់តាំងពីឆ្នាំ២០១១មក សហរដ្ឋអាមេរិកបានជំពាក់ថ្លៃសេវារបស់អង្គការយូណេស្កូប្រមាណ ៦១២លានដុល្លារអាមេរិក ខណៈដែលប្រទេសនេះ ក៏ជំពាក់មូលនិធិបេតិកភណ្ឌពិភពលោកប្រហែល ៧,៩១លានដុល្លារអាមេរិកផងដែរ។

សរុបមក បំណុលទាំងអស់មានចំនួន ៦១៩លានដុល្លារអាមេរិក។ការដកខ្លួនដដែលៗនេះបានបង្កឱ្យមានការព្រួយបារម្ភក្នុងចំណោមប្រទេសជាច្រើន ដែលចង់ឱ្យសហរដ្ឋអាមេរិក​ធ្វើឱ្យ​ប្រាកដ​ថា​រឿងស្រដៀងគ្នានេះនឹងមិនកើតឡើងម្តងទៀត។ អង្គការយូណេស្កូដែលត្រូវបានបង្កើតឡើងក្នុងឆ្នាំ១៩៤៦​ត្រូវបានឧទ្ទិសដល់ការលើកកម្ពស់​កិច្ចសហប្រតិបត្តិការ​ក្នុងចំណោម​ប្រទេសនានាតាមរយៈការអប់រំ វិទ្យាសាស្ត្រ និងវប្បធម៌៕