កាលពីថ្ងៃព្រហស្បតិ៍មិញ ប្រទេសតួកមេនីស្ថាន បានបើកសម្ពោធន៍ដាក់ឲ្យប្រើប្រាស់ទីក្រុងឆ្លាតវៃនាពេលអនាគតថ្មី ដើម្បីឧទ្ទិសដល់អតីតប្រធានាធិបតី Kurbanguly Berdymukhamedov (ប៊ើឌីមូខាមេដូវ) ។ 

ទីក្រុងមួយនេះ ត្រូវបានគេដាក់ឈ្មោះ “Arkadag” ឬ “អ្នកការពារ” គឺជាងារក្រៅផ្លូវការដែលសារព័ត៌មានតួកមេនីស្ថាន ចង់បានជាយូរមកហើយសម្រាប់លោក Berdymukhamedov ដែលកាលពីថ្ងៃព្រហស្បតិ៍ បានប្រារព្ធខួបកំណើតលើកទី ៦៦របស់លោក ដោយធ្វើដំណើរទៅកាន់ទីក្រុងពិសិដ្ឋមូស្លីម Mecca របស់ប្រទេសអារ៉ាប៊ីសាអូឌីត ។ 

ប្រភពព័ត៌មានដែលនៅជិតស្និទ្ធនឹងរដ្ឋាភិបាល បាននិយាយប្រាប់ទីភ្នាក់ងារព័ត៌មានរ៉យទ័រថា ទីក្រុងថ្មីនេះ សម្រាប់ប្រជាពលរដ្ឋរស់នៅ ៧៣.០០០នាក់ ដោយចំណាយថវិកាសាងសង់អស់ចំនួន ៣,៣ពាន់លានដុល្លារ ហើយនិងមានគម្រោងចំណាយច្រើនម្តងទៀតនៅក្នុងរយៈពេលប៉ុន្មានឆ្នាំខាងមុខ ។ 

អគារទំាងអស់នៅក្នុងទីក្រុង Arkadag មានពណ៌ស. ហើយប្លុកអគារផ្ទះល្វែងទាំងអស់មានកម្ពស់ ៧ជាន់ ដែលជាលេខនាំសំណាង ។ 

មានតែរថយន្តអគ្គិសនីប៉ុណ្ណោះ ត្រូវបានអនុញ្ញាតឲ្យធ្វើចរាចរណ៍នៅក្នុងទីក្រុងមួយនេះ ដែលរួមមានវិមានឧទ្ទិសដល់សេះបង្កាត់ Akhal Teke របស់តួកមេនីស្ថាន និងរូបលោក Berdymukhamedovខ្លួនឯងផ្ទាល់ ហើយវាត្រូវបានសាងសង់ឡើងនៅជិតភូមិកំណើតរបស់លោកតែម្តង នៅតំបន់ភាគខាងត្បូងតួកមេនីស្ថាន ។