ភ្លៀងធ្លាក់ខ្លាំងកំពុងវាយលុកតំបន់ Kyushu(ឃ្យូស៊ូ) ប្រទេសជប៉ុនភាគខាងលិច។ មន្ត្រីអាកាសធាតុ កំពុងព្រមានអំពីភ្លៀងធ្លាក់បន្ថែមទៀតរហូតដល់ថ្ងៃសៅរ៍ ដោយបង្កើន​ឱកាស​នៃបំណាក់​ដី និងគ្រោះមហន្តរាយផ្សេងៗទៀត។

ទីភ្នាក់ងារឧតុនិយមប្រទេសជប៉ុន និយាយថា ស្ថានភាពបរិយាកាសលែងមានស្ថិរភាពនៅក្នុងតំបន់ធំទូលាយជាច្រើនពីភាគខាងលិចនិងភាគខាងជើងប្រទេសជប៉ុន។ក្នុងអំឡុង​ពេល​មួយ​​ម៉ោងរហូត​ដល់ម៉ោង ១១ព្រឹកថ្ងៃសុក្រ កម្រិតភ្លៀងធ្លាក់ ៥១មីល្លីម៉ែត្រ បានធ្លាក់នៅក្នុងទីក្រុង Usa ក្នុងខេត្ត Oita(ឣូឣ៊ិតា) តំបន់ Kyushu។

ការព្រមានពីបំណាក់​ដី មានសម្រាប់ផ្នែកមួយចំនួននៅខេត្ត Oita, Saga និងខេត្ត Fukuoka(ហ្វ៊ូគូឣុកា)។ មន្ត្រីអាកាសធាតុបាននិយាយថា ស្ថានភាពបរិយាកាសនឹង​បន្តអស្ថិរភាព​នៅក្នុងប្រទេស​ជប៉ុនរហូតដល់ថ្ងៃសៅរ៍ ជាពិសេសនៅតាមឆ្នេរសមុទ្រប្រទេសជប៉ុន ដោយមានភ្លៀងធ្លាក់លើសពី ៨០ មីល្លីម៉ែត្រក្នុងមួយម៉ោង និងមានរន្ទះនៅកន្លែងខ្លះ។

មន្ត្រីបានបានព្យាករណ៍ថា ផ្គររន្ទះដែលកើតឡើងអាចបន្តនៅតំបន់ Kyushu ភាគខាងជើង និងភាគខាងត្បូង ព្រមទាំងខេត្ត Yamaguchi ដែលនៅជិតខាងរហូតដល់ព្រឹកថ្ងៃសៅរ៍ ដែលនេះអាចបង្កើនទឹកភ្លៀង និងហានិភ័យនៃគ្រោះមហន្តរាយ។