រដ្ឋមន្ត្រីការបរទេសជប៉ុន លោក Hayashi Yoshimasa បានបង្ហើបថា សហភាពអឺរ៉ុបកំពុងឈានឆ្ពោះទៅរកការដក​ចេញវិធានការរឹតត្បិតការ​នាំចូលអាហារលើ​ផលិតផលរបស់ប្រទេស​ជប៉ុនមួយចំនួន។

វិធានការនេះបានធ្វើឡើងបន្ទាប់ពីឧបទ្ទវហេតុនុយក្លេអ៊ែររោងចក្រ Fukushima Daiichi ឆ្នាំ២០១១។ សហភាពអឺរ៉ុប ទាមទារលិខិតបញ្ជាក់ការត្រួតពិនិត្យវិទ្យុ​សកម្មសម្រាប់ផលិតផល​សមុទ្រមួយ​ចំនួន រុក្ខជាតិព្រៃដែលអាចបរិភោគបាន និងមុខទំនិញផ្សេងទៀតដែលនាំចូលពីខេត្តចំនួន១០ រួមទាំងខេត្ត Fukushima និងខេត្ត Miyagi។ លោក Hayashi បានប្រាប់អ្នក​សារព័ត៌មាន នៅថ្ងៃសុក្រនេះថា សហភាពអឺរ៉ុបកំពុងពិនិត្យឡើងវិញវិធានការនេះ ហើយលោកដឹងថាមានចំណាត់ការជាវិជ្ជមានឈានទៅរកការដកចេញវិធានការរឹតត្បិត។ លោក​និយាយ​​ថា រដ្ឋាភិបាលជប៉ុនស្វាគមន៍ចំពោះចំណាត់ការនេះ។ លោកបាននិយាយថាទីក្រុងតូក្យូ បានឆ្លៀតចាប់យកគ្រប់ឱកាស ដើម្បីអំពាវនាវឱ្យមានការដកចេញ​វិធានការរឹតត្បិត​ឱ្យ​បាន​ឆាប់។ លោក Hayashi បានសម្តែងក្តីសង្ឃឹមថាសហភាពអឺរ៉ុប នឹងលុបចោលវិធានការនេះ និងផ្តល់ការជំរុញដ៏ធំដល់ការកសាងឡើងវិញ​នូវតំបន់ដែលរងផលប៉ះពាល់​ដោយគ្រោះ​មហន្តរាយ។