ភ្នំពេញ ៖ នេះជាការចាប់ផ្តើមថ្មីមួយ ដើម្បីជំរុញការបញ្ជ្រាបនូវការយល់ដឹងពីការប្រើប្រាស់ និងផលប៉ះពាល់នៃ​បច្ចេកវិទ្យាឌីជីថល ជាពិសេសការយល់ដឹងនូវទស្សនាទាន សន្តិសុខសាយប័រ ដែលកំពុងមានការគំរាមកំហែង និងហានិភ័យថ្មីៗនៅលើប្រព័ន្ធអ៊ីនធឺណិត។ នេះបើតាមឯកឧត្តម លីវ សុផាណារិទ្ធ រដ្ឋលេខា ធិការក្រសួងប្រៃសណីយ៍ និងទូរគមនាគមន៍ បានថ្លែងក្នុងពិធីបើកវគ្គបណ្តុះបណ្តាលសារព័ត៌មានស្តីពី «ការប្រើប្រាស់ប្រព័ន្ធទំនាក់ទំនង​សង្គម​ប្រកបដោយប្រសិទ្ធភាព និងសុវត្ថិភាពសម្រាប់អ្នកសារព័ត៌មា ន»នាថ្ងៃទី៣០ ខែមិថុនា។

គោលបំណងនៃវគ្គបណ្តុះបណ្តាលនេះគឺ ដើម្បីផ្តល់ឱកាសដល់អ្នកសារព័ត៌មាននូវចំណេះដឹងបន្ថែមអំពីការប្រើប្រាស់ កម្មវិធីថត កាត់តវីដេអូតាមទូរសព្ទដៃ ការ Edit រូបថត ដាក់ក្រេឌីតលើរូបថតដោយប្រើទូរសព្ទដៃ និងការប្រើប្រាស់​បណ្តាញទំនាក់ទំនងសង្គមជាដើម។

លោក ពុយ គា ប្រធានក្លិបអ្នកកាសែតកម្ពុជា បានថ្លែងថា វគ្គសិក្សានេះ គឺដើម្បីឱ្យអ្នកសារពត៌មានបានពង្រឹង​សមត្ថភាព និងអភិវឌ្ឍខ្លួនឱ្យទាន់សភាពការណ៍។ នេះ គឺជាការចាប់ផ្តើមវគ្គបណ្តុះបណ្តាលថ្មីមួយទៀតក្នុងឆ្នាំ២០២៣ ក្រៅពីវគ្គសិក្សាជាច្រើនដែលត្រូវបានដំណើរការតាំងពីដើមឆ្នាំមក។

ឯកឧត្តមបណ្ឌិត សេង សុភាព ប្រធានបណ្ឌិត្យសភាបច្ចេកវិទ្យាឌីជីថលកម្ពុជា បានលើកឡើងដែរថាបណ្ឌិត្យ​សភាបច្ចេកវិទ្យាឌីជីថលកម្ពុជា រីករាយនឹងសហការជាមួយក្លិបអ្នកកាសែតកម្ពុជា ក្នុងការបណ្តុះបណ្តាល​អ្នក​សារពត៌មានលើវិស័យឌីជីថល ក៏ដូចជាពង្រឹងសមត្ថភាពរបស់អ្នកកាសែតលើអភិ បាលកិច្ចឌីជីថលផងដែរ។

វគ្គបណ្ដុះបណ្ដាលនេះរៀបចំដោយ ក្លិបអ្នកកាសែតកម្ពុជា(ក.អ.ក) សហការជាមួយក្រសួងប្រៃសណីយ៍ និងទូរគមនាគមន៍ ដែលមានរយៈពេល២ថ្ងៃគឺនៅថ្ងៃទី៣០ ខែមិថុនា និងនៅថ្ងៃទី៥ ខែកក្កដា ឆ្នាំ២០២៣ នៅ​វិទ្យាស្ថានអភិបាលកិច្ចឌីជីថល ស្ថិតនៅសង្កាត់ព្រែកលៀប ខណ្ឌជ្រោយចង្វា រាជធានីភ្នំពេញ៕

​

ដោយ៖ គង់ ឌិន​