នាថ្ងៃទី១ ខែកក្កដា ឆ្នាំ២០២៣ សម្ដេចក្រឡាហោម ស ខេង អនុប្រធានគណបក្សប្រជាជនកម្ពុជា បាន​ដឹកនាំ​សមាជិក សមាជិកាគណបក្សប្រជាជនកម្ពុជាខេត្តបាត់ដំបង ជាង២ម៉ឺននាក់ ប្រារព្ធ​ពិធី​អបអរ​សាទរ​ខួប​លើកទី៧២ ថ្ងៃបង្កើតគណបក្សប្រជាជនកម្ពុជា និងបើកយុទ្ធនាការ​ឃោសនា​បោះឆ្នោត​ជ្រើស​តាំង​តំណាង​រាស្ត្រ នីតិកាលទី៧ ។

ថ្លែងក្នុងពិធីនេះ សម្ដេច ស ខេង អំពាវនាវដល់ថ្នាក់ដឹកនាំ សមាជិក សមាជិកា និង​អ្នក​គាំទ្រ​គណបក្ស​ប្រជាជន​កម្ពុជា ព្រមទាំងបងប្អូនប្រជាពលរដ្ឋទាំងអស់មេត្តាចូលរួមក្នុងការបោះឆ្នោតឱ្យបានច្រើនកុះករ និង​សូម​ចូលរួមគោរព អនុវត្តន៍ឱ្យបានត្រឹមត្រូវតាមច្បាប់ បទបញ្ជា និងនីតិវិធី ក្រមសីលធម៌ នៃ​ការ​បោះឆ្នោត​ ដើម្បី​ធានាឱ្យការបោះឆ្នោតប្រព្រឹត្តទៅដោយជោគជ័យ ប្រកបដោយលក្ខណៈសេរី ត្រឹមត្រូវ យុត្តិធម៌ និងមានសុវត្ថិភាពយ៉ាងល្អប្រសើរ។

សម្ដេចក្រឡាហោម អំពាវនាវដល់អ្នកបោះឆ្នោតទាំងអស់ គឺអ្នកដែល​មាន​ឈ្មោះ​ក្នុង​បញ្ជី​បោះឆ្នោត​សូម​មេត្តា​អញ្ជើញ​ទៅបោះឆ្នោតឱ្យបានគ្រប់ៗគ្នា និងគូសសញ្ញា​ឱ្យ​បាន​ត្រឹម​ត្រូវ​​ ដើម្បី​បោះ​ឆ្នោត​គាំទ្រ​គណបក្ស​ប្រជាជនកម្ពុជាដែលមានលំដាប់លេខរៀងទី១៨ នៃសន្លឹកឆ្នោតនៅថ្ងៃទី២៣ ខែកក្កដា ឆ្នាំ២០២៣។

ជាមួយគ្នានេះ អ្នកគាំទ្រគណបក្សប្រជាជនកម្ពុជា បានបង្ហាញអារម្មណ៍​សប្បាយ​រីករាយ​ដែល​បាន​ចូល​រួម​ក្នុង​យុទ្ធ​នាការឃោសនាបោះឆ្នោតនាថ្ងៃដំបូងនេះ ដោយក្នុងនោះពួកគេបានអះអាងថានៅកម្ពុជា មាន​តែ​គណបក្សប្រជាជនកម្ពុជាតែមួយប៉ុណ្ណោះ ដែលមានសមត្ថភាពរក្សាសន្តិភាព និង​បន្ត​ការ​អភិវឌ្ឍ​ប្រទេស​ជាតិ។

អ្នកគាំទ្របានបង្ហាញជំនឿយ៉ាងមុតមាំថា គណបក្សប្រជាជន​កម្ពុជា​នឹង​ឈ្នះ​ការ​បោះ​ឆ្នោត​ជ្រើស​តាំង​តំណាង​រាស្រ្ត​នីតិកាលទី៧ ដើម្បីបន្តដឹកនាំ​មាគ៌ា​កម្ពុ​ជា​ឆ្ពោះ​ទៅ​កាន់​ការ​អភិវឌ្ឍ​រីក​ចម្រើន​ទៅ​មុខ​បន្ថែម​ទៀត​។

សូមបញ្ជាក់ថា កៅអីតំណាងរាស្រ្តនៅក្នុងខេត្តបាត់ដំបងមានចំនួន៨ អាសនៈ ក្នុងនោះ​គណបក្ស​នយោបាយ​ចំនួន​១៣បានចុះឈ្មោះប្រកួតប្រជែងការបោះឆ្នោត ខណៈអ្នកមានឈ្មោះ​ក្នុង​បញ្ជី​បោះឆ្នោត​មាន​ជាង​ ៦៦ម៉ឺននាក់៕ អត្ថបទ៖ នឿត សុភ័ក្ត្រ