ព្រែវែង៖ សមាជិក-សមាជិកា ក្រុមការងារថ្នាក់ជាតិចុះជួយស្រុកព្រះស្ដេច នៃគណបក្សប្រជាជនកម្ពុជា​ចំនួនជាង ៣៣០០នាក់ នៅថ្ងៃដំបូងនេះ បានបើកយុទ្ធនាការឃោសនារកសំឡេងឆ្នោត ដោយបានហែរក្បួនឃោសនាទៅកាន់ភូមិ-ឃុំ នៅក្នុងស្រុកព្រះស្តេច ខេត្តព្រៃវែង។

នៅថ្ងៃទី១ខែ កក្កដា ឆ្នាំ២០២៣នេះ និងជាថ្ងៃដំបូង នៃការបើកយុទ្ធនាការឃោសនារក​សំឡេង​ឆ្នោតរបស់គណបក្សនយោបាយផ្សេងៗ ក្នុងនោះសម្រាប់សមាជិក-សមាជិកា ប្រធាន-អនុក្រុមការងារថ្នាក់ជាតិចុះជួយស្រុកព្រះស្ដេច ​នៃគណបក្សប្រជាជនកម្ពុជា ចំនួនជាង ៣ ៣០០ នាក់ បានចូលរួមអបអរសាទរខួបលើកទី៧២ ថ្ងៃបង្កើតគណបក្សប្រជាជនកម្ពុជា និងពិធីបើក​យុទ្ធនាការ​ឃោសនាបោះឆ្នោតជ្រើសតាំងតំណាងរាស្រ្ត ​នីតិកាលទី៧ ដោយសមាជិក-សមាជិកា​គណបក្សប្រជាជនកម្ពុជាទាំងអស់ នៅស្រុកព្រះស្តេច បានយកចិត្តទុកដាក់ ត្រងត្រាប់ស្តាប់ ប្រកប​ដោយសេចក្តីសប្បាយរីករាយ ​នូវសេចក្តីថ្លែងការណ៍រួមរបស់សម្តេច​អគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា។

បន្ទាប់ពីស្តាប់នូវប្រសាសន៍ដ៏ថ្លៃថ្លា ​របស់ប្រមុខនៃគណបក្សប្រជាជនកម្ពុជា​ ឯកឧត្តម ហ៊ី ប៉ាវី ប្រធាន​ក្រុមការងារថ្នាក់ជាតិចុះ ​ជួយស្រុកព្រះស្ដេច បានលើកឡើងអំពីគោលការណ៍​គន្លឹះ​មួយចំនួនរបស់គណបក្សប្រជាជនកម្ពុជា ​និងបានប្រកាសរៀបចំក្បូនយុទ្ធនា ការឃោសនា​រកសំឡេងឆ្នោតនៅថ្ងៃដំបូងនេះ ។

ក្នុងនោះ ឯកឧត្តម ស្នើឲ្យសមាជិក-សមាជិការដែលចូលរួមទាំងអស់, នៅពេលចេញ ដំណើរហែរក្បូន សូមធ្វើដំណើរប្រកបដោយស្មារតីទទួលខុសត្រូវខ្ពស់​ មានការយោគយល់ និង​ចេះអាព្យាស្រ័យគ្នាទៅវិញទៅមក ជាពិសេសការអនុវត្តឲ្យបានល្អ តាមសេចក្តីជូន​ដំណឹងរបស់គណៈកម្មាធិការជាតិរៀបចំការបោះឆ្នោត ​(គ.ជ.ប) ​ដើម្បីផ្តល់នូវបរិយាកាស សុខ​សុវត្ថិភាព គ្មានការ​បំភិតបំភ័យ​ ការ​គំរាមកំហែង និងគ្មានហិង្សា​ ឬការរំខានអុកឡុក និង​ការរំខានដល់ការហែរក្បូនជាដើម។

ជុំវិញការហែរក្បូននេះដែរ, សមាជិក-សមាជិកា ប្រធាន-អនុក្រុមការងារថ្នាក់ជាតិ​ចុះជួយ​ស្រុកព្រះស្ដេច នៃគណបក្សប្រជាជនកម្ពុជាទាំងអស់ បាន​ចេញ​ហែក្បូនឃោសនា​រក​សំឡេងឆ្នោតទៅកាន់តាមបណ្តាភូមិជាច្រើន ​នៃឃុំចំនួន ១១ នៅក្នុងស្រុកព្រះស្តេច ខេត្តព្រៃវែង ក្នុងនោះបន្ទាប់ពីការហែរចេញពីគណបក្សប្រជាជនកម្ពុជាស្រុក ផែននីមួយៗ ក៏បាន​បំបែកហែរ​ទៅកាន់ភូមិ-ឃុំរបស់ខ្លួន ​ដើម្បីឃោសនារកសំឡេងឆ្នោតបន្ត។

សូមបញ្ជាក់ថា យុទ្ធនាការឃោសនារកសំឡេងឆ្នោតជ្រើសរើសតាំងតំណាងរាស្រ្ត នីតិកាលទី៧ គណៈកម្មាធិការជាតិរៀបចំការ​បោះឆ្នោត (គ.ជ.ប) បានកំណត់ការចេញឃោសនា​បោះឆ្នោត​មានរយៈពេល ២១ថ្ងៃ ដោយចាប់ពីថ្ងៃទី១ រហូតដល់ថ្ងៃទី២១ ខែកក្កដា ឆ្នាំ២០២៣ ក្នុងនោះ​គណបក្សនយោបាយ ​ដែលត្រូវបានទទួលស្គាល់ជាផ្លូវការដោយ ​គ.ជ.ប ចំនួន ១៨ មាន​សិទ្ធិធ្វើការ​ឃោសនា​រកសំឡេងឆ្នោត ​ដោយគោរពទៅតាមច្បាប់បទបញ្ជា ​និងនីតិវិធីនៃការបោះឆ្នោត សេចក្ដីណែនាំ ​ស្តីពីការឃោសនាបោះឆ្នោត ​ក្នុងស្មារតីទទួលខុសត្រូវ ​និងត្រូវមានការយោគយល់ អធ្យាស្រ័យគ្នាទៅវិញទៅមក៕អត្ថបទ៖ សុន រ៉ាឌី,