ទីក្រុង នីងប៉ូ (Ningbo) ក្នុងខេត្តជឺជាំង (Zhejiang) ភាគខាងកើតប្រទេសចិន ត្រូវបានគេមើលឃើញថា ការនាំចេញឧបករណ៍ផ្តល់ភាពត្រជាក់កើនឡើង ខណៈដែលសីតុណ្ហភាពដ៏ក្តៅគគុកនៅទូទាំងពិភពលោក ជំរុញឱ្យតម្រូវការប្រភេទឧបករណ៍ទាំងនោះកើនឡើង ក្នុងល្បឿនយ៉ាងលឿន។

ក្រុមហ៊ុនផលិតម៉ាស៊ីនត្រជាក់នៅក្នុងទីក្រុងកំពង់ផែមួយនេះនាំចេញទំនិញសរុបជាង ១០០លានដុល្លារ អាមេរិកក្នុងមួយឆ្នាំ។ នៅក្នុងឆមាសទីមួយនៃឆ្នាំនេះ រោងចក្របានដំណើរការ យ៉ាងពេញទំហឹង ដើម្បីបំពេញតម្រូវការដែលកំពុងកើនឡើងពីទីផ្សារក្រៅប្រទេស។

តម្រូវការកង្ហារអគ្គិសនីក៏មានការកើនឡើងផងដែរ។ ក្រុមហ៊ុនផលិតក្នុងស្រុកបានប្រាប់ទូរទស្សន៍កណ្តាលចិន (CCTV) ថាការបញ្ជាទិញរបស់ពួកគេ​សម្រាប់រដូវក្តៅទាំងអស់ ត្រូវបានចែកចាយអស់ក្នុងខែមិថុនាកាលពីឆ្នាំមុន​ ប៉ុន្តែនៅឆ្នាំនេះ ពួកគេត្រូវធ្វើការរហូតដល់ចុងខែសីហា ដើម្បីបំពេញការបញ្ជាទិញ​ដែលកំពុងកើនឡើង។

ក្នុងរយៈពេលប្រាំខែដំបូង ​ក្រុមហ៊ុននេះ​បានដឹកជញ្ជូនកង្ហារចំនួន ២,៣៥ លានគ្រឿងទៅកាន់អ្នក​ទិញនៅក្រៅប្រទេស ដែលមានតម្លៃសរុប​ ២០លានដុល្លារអាមេរិក ដោយកើនឡើង ២៤០ភាគរយ​បើធៀបនឹងឆ្នាំមុន៕