ក្រុមបាល់ទាត់ជម្រើសជាតិនារីអាយុក្រោម ១៩ឆ្នាំកម្ពុជា បានចាកចេញពីមាតុភូមិ ដើម្បី​ចូលរួម​ការ​ប្រកួត​បាល់ទាត់នារីជ្រើសរើសជើងឯកអាស៊ីអាគ្នេយ៍អាយុក្រោម ១៩ឆ្នាំ ឆ្នាំ២០២៣ AFF U19 Women’s Championship 2023 នៅប្រទេសឥណ្ឌូនេស៊ីហើយ កាល​ពី​យប់​រំលង​អធ្រាត្រ​ឈាន​ចូល​ថ្ងៃទី០៣ ខែកក្កដា ឆ្នាំ២០២៣ នេះ ។

ព្រឹត្តិការណ៍នេះ គ្រោងចាប់ផ្ដើមការប្រកួតផ្លូវការ ពីថ្ងៃទី០៥ រហូតដល់ថ្ងៃទី១៥ ខែកក្កដា ឆ្នាំ​២០២៣ ខាងមុខ ដោយមានបេក្ខភាព ១០ក្រុមចូលរួម និងបែងចែកជា ៣ពូល ក្នុង​នោះ​ក្រុម​ជម្រើស​ជាតិ​នារី U19 កម្ពុជា ស្ថិតក្នុងពូល A ជាមួយក្រុមម្ចាស់ផ្ទះឥណ្ឌូនេស៊ី ឡាវ និង​ទីម័រ​ខាង​កើត ខណៈ ២ពូលទៀត មាន ៣ក្រុមដូចគ្នា ក្នុងនោះពូល B មានវៀតណាម ម៉ាឡេស៊ី និង​សិង្ហបុរី និងពូល C មានថៃ មីយ៉ាន់ម៉ា និងហ្វីលីពីន ។

សម្រាប់បេសកកម្មរបស់ក្រុមបាល់ទាត់នារីអាយុក្រោម ១៩ឆ្នាំកម្ពុជា គឺដឹកនាំដោយលោក ប្រាក់ វុទ្ធី ហើយមុនចេញដំណើរ ពោលគឺនៅថ្ងៃទី០២ ខែកក្កដាម្សិលមិញ សហព័ន្ធ​កីឡា​បាល់​ទាត់​កម្ពុជា បានបង្ហាញកីឡាការិនីចំនួន ២៣នាក់ ដែលបានជាប់បញ្ជីឈ្មោះចុងក្រោយ ក្នុ​ង​នោះ​មាន​កីឡា​ការិនី​ក្លិបព្រះខ័នរាជស្វាយរៀង ២នាក់, ខេត្តសៀមរាប ៧នាក់, ណាហ្គាវើលដ៏ ៣នាក់, វិសាខា ៥នាក់, បឹងកេត ៤នាក់ និងសមាជិកក្លិបភ្នំពេញក្រោន ២នាក់ ។

ចំពោះការប្រកួតដែលធ្វើឡើងនៅកីឡដ្ឋាន Gelora Sriwijaya នៃ​ខេត្ត Palembang ​ប្រទេស​ឥណ្ឌូនេស៊ី​នេះ សម្រាប់ក្រុមបាល់ទាត់នារី U19 កម្ពុជា នឹងត្រូវជួបឡាវមុនគេ នាថ្ងៃទី០៥-កក្កដា មុន​បន្ដជួបក្រុមទីម័រខាងកើត នាថ្ងៃទី៧-កក្កដា និងចុងក្រោយជួបក្រុមម្ចាស់ផ្ទះឥណ្ឌូនេស៊ី នាថ្ងៃ​ទី០៩ ខែកក្កដាខាងមុខ ។ រីឯរូបមន្ដការប្រកួតនេះ ក្រោយបញ្ចប់ការប្រកួតជម្រុះក្នុងពូល ក្រុម​ឈរ​លេខ​១ នៃពូលនីមួយៗ ព្រមទាំងក្រុមចំណាត់ថ្នាក់លេខ២ ល្អជាងគេប្រចាំពូលទាំង ៣ នឹង​ទទួល​បាន​កៅអីវគ្គពាក់កណ្ដាលផ្ដាច់ព្រ័ត្រតែម្ដង ៕ អត្ថបទ លី ឈុនឡា