គម្រោងថ្មីមួយទៀតនៅភ្នំពេញ គឺចំណតរថយន្ត ផ្សារទំនើប ភោជនីយដ្ឋាន និង​សេវាកម្ម​ផ្សេង​ៗ​ទៀត ដែលនៅក្រោមដី ត្រូវបានប្រារព្ធពិធីក្រុងពាលី និងបញ្ចុះបឋមសិលាសាងសង់ នា​ព្រឹក​ថ្ងៃ​ទី៣ ខែកក្កដា ឆ្នាំ២០២៣ ក្រោមអធិបតីភាព ឯកឧត្តម ឃួង ស្រេង អភិបាលរាជធានីភ្នំពេញ នៅ​ក្រោម​ដីឡូត៍ ផ្លូវលេខ ១០៦-១០៨ និងលេខ ១៣-១៩ ក្នុងសង្កាត់វត្តភ្នំ ខណ្ឌដូនពេញ ។

ឯកឧត្តម ឃួង ស្រេង បានមានប្រសាសន៍ថា ចំណតរថយន្ត ផ្សារទំនើប ភោជនីយដ្ឋាន និង​សេវា​កម្ម​ផ្សេងៗទៀតនេះត្រូវបានស្ថាបនាឡើងដោយក្រុមហ៊ុន អ៊ីឌីស៊ីផូ ខេមបូឌា ដែលជា​ក្រុម​ហ៊ុន​ក្នុង​ស្រុក ។ គម្រោងនេះ ក្រុមហ៊ុនបានបណ្ដាក់ទុនវិនិយោគក្នុងទំហំទឹកប្រាក់ដ៏ច្រើន ដែល​មាន​ទាំង​ចំណត​សាធារណៈ ផ្សារទំនើប និងសេវាកម្មផ្សេងៗ ស្ថិតនៅខាងក្រោមដី ដែ​ល​ជា​គម្រោង​ថ្មី​មួយ​មិន​ធ្លាប់​មានឡើយ នៅក្នុងមូលដ្ឋានខណ្ឌដូនពេញ ។ គម្រោងនេះ ពិតជា​បាន​ឆ្លុះ​បញ្ចាំង​ឱ្យ​ឃើញ​នូវ​ភាពជោគជ័យថ្មីមួយទៀត នៃការអនុវត្តកម្មវិធីនយោបាយ និងយុទ្ធសាស្តចតុកោណ ដំណាក់​កាលទី៤ នាចុងអាណត្តិដឹកនាំរបស់រាជរដ្ឋាភិបាល នីតិកាលទី៦ នៃរដ្ឋសភា យ៉ាង​ពិត​ប្រាកដ​។

ឯកឧត្តម ឃួង ស្រេង បានបន្តថា ខណ្ឌដូនពេញនាពេលបច្ចុប្បន្ន បាន​ក្លាយ​ជា​ចំណុច​ប្រសព្វ​ដ៏​សំខាន់ និងជាតំបន់លំនៅឋាន ពាណិជ្ជកម្មដ៏ធំមួយចំកណ្តាលបេះដូងរាជធានីភ្នំពេញ ដែល​មាន​លំហូរ​ចរាចរណ៍យានយន្តធ្វើដំណើរលើដងផ្លូវយ៉ាងមមាញឹកស្ទើរតែគ្រប់ពេលវេលា និង​មាន​ចរន្ត​នៃ​ការ​ដោះដូរទំនិញ សេវាកម្មទាំងទីផ្សារក្នុងប្រទេស និងទីផ្សារអន្តរជាតិយ៉ាងសកម្មបំផុតរួមមាន វិស័យ​ធនាគារ ហិរញ្ញវត្ថុ ពាណិជ្ជកម្ម សេវាកម្មទំនើប ការស្តុកទុក ចែកចាយ​ផលិតផល​សម្រេច​ក្នុង​ស្រុក និងបរទេស ព្រមទាំងការជួញដូរក្នុងទីផ្សារចម្រុះជាដើម ដែលសកម្មភាព​ទាំង​នេះ​បាន​ធ្វើ​ឱ្យ​ទី​ក្រុងភ្នំពេញកាន់តែមានភាពរស់រវើក ទាក់ទាញ និងមមាញឹកបំផុត។ ដូច្នេះការ​ដោះស្រាយ​បញ្ហា​ការ​កក​ស្ទះចរាចរណ៍ ចំណតសាធារណៈ និងការវិនិយោគបែបប្រណីត គឺជា​ជម្រើស​ដ៏​គាប់​ប្រសើរ​សម្រាប់​រាជធានីភ្នំពេញក្នុងសតវត្សរ៍ថ្មីនេះ។

ឯកឧត្តម ឃួង ស្រេង បានបញ្ជាក់ថា គម្រោងនេះ គឺជាការរួមចំណែកដ៏ល្អរបស់វិស័យឯកជន ក្នុង​ភាព​ជាដៃគូជាមួយនិងអាជ្ញាធរមូលដ្ឋាន ដើម្បីដោះស្រាយ​នូវ​បញ្ហា​ចំណត​សាធារណៈ​ក្នុង​ទីក្រុង បង្កើតជម្រើសធុរកិច្ចជូនអាជីវករកាន់តែសម្បូរបែប និងលើក​កម្ពស់​សោភ័ណ​ភាព​រាជ​ធានី​ភ្នំពេញ​ឱ្យ​កាន់តែស្រស់បំព្រង និងស៊ីវិល័យបន្ថែមទៀត ព្រោះថា មុននេះធ្លាប់​តែ​លឺអំពី​ចំណត​រថយន្ត និងផ្សារទំនើបក្រោមដីនៅតាមបណ្តាទីក្រុងនៃប្រទេសអភិវឌ្ឍន៍ ប៉ុន្តែ​ឥឡូវ​ទីក្រុង​ភ្នំពេញ​ក៏​នឹង​មាន​សមិទ្ធផលថ្មីនេះ ក្រោមម្លប់នៃសន្តិភាពរបស់សម្ដេចតេជោនាយករដ្ឋមន្ត្រី យ៉ាង​ពិត​ប្រាកដ​។

លោកស្រី ឧកញ៉ា ចាន់ សុទ្ធា អគ្គនាយិកា ក្រុមហ៊ុន អុីឌីស៊ីជូតា ខេមបូឌា បាន​មាន​ប្រសាសន៍​ថា ចំណតរថយន្ត ផ្សារទំនើប ភោជនីយដ្ឋាន និងសេវាកម្មផ្សេងៗទៀតនេះ ត្រូវ​បាន​អនុញ្ញាត​ដោយ​រាជ​រដ្ឋាភិបាល ដោយសាងសង់ចំនួន៤ជាន់ ២ជាន់ជាចំណតរថយន្ត ២ជាន់​ទៀតជា​ផ្សារ​ទំនើប លើផ្ទៃដីទំហំ ៣៣ ១២០ ម៉ែត្រការ៉េ ដែលអាចចតរថយន្តបានចំនួន ៥១៦គ្រឿង ។ គោល​បំណងដែលក្រុមហ៊ុនបង្កើតឡើងនូវគម្រោងខាងលើនេះ គឺដើម្បី​ចូល​រួម​កាត់​បន្ថយ​ការ​កក​ស្ទះ​ចរាចរ និង​បង្កើត​មុខរបរ​ឱ្យ​អាជីវករ​តូច​តាច​អាច​ប្រកប​មុខ​របរ​លក់​ដូរ​នៅ​ក្នុង​អគារ​ក្រោម​ដី​នេះ​បាន​៕​ អត្ថបទ ៖ ប្រាក់ វ៉ាន់ដា