ភ្នំពេញ៖ អគារស្នាក់ការគណបក្សប្រជាជនកម្ពុជាឃុំបារាយណ៍ កាលពីព្រឹកថ្ងៃទី២កក្កដា ឆ្នាំ២០២៣នេះ បានសម្ពោធដាក់ឱ្យប្រើប្រាស់ជាផ្លូវការ ក្រោមអធិបតីភាពរបស់ ឯកឧត្តម ប៉ាន សូរស័ក្តិ បេក្ខជនតំណាងរាស្រ្តខេត្តកំពង់ចាម និងជាប្រធានក្រុមការងារគណបក្សចុះមូលដ្ឋានស្រុកព្រៃឈរ និងស្រុកបាធាយ។

ឯកឧត្តម ប៉ាន សូរស័ក្តិ មានប្រសាសន៍ថា អគារថ្មី ដែលសម្ពោធដាក់ឱ្យប្រើប្រាស់ជាផ្លូវការនៅ​ពេលនេះ​ បង្ហាញឱ្យឃើញពីភាពរីកចម្រើនច្បាស់លាស់ និងភាពរឹងមាំរបស់គណបក្សប្រជាជន​កម្ពុជា​ក្នុងការបម្រើប្រជាពលរដ្ឋដោយភាពស្មោះត្រង់។

ឯកឧត្តមបានបន្តថា អស់រយៈពេលជាង ៤៤ឆ្នាំកន្លងទៅ បន្ទាប់ពីថ្ងៃជ័យជម្នះ៧មករា ជាប្រវត្តិ​សាស្ត្រ​លើរបបប្រល័យពូជសាសន៍ គណបក្សប្រជាជនកម្ពុជា បានរួមសុខរួមទុក្ខជាមួយប្រជាជន និងបានប្រែក្លាយកម្ពុជាពីរបបវាលពិឃាត ទៅជាទឹកដីដ៏ស្រស់បំព្រង ដែលប្រជាជនបានរស់នៅ​យ៉ាង​សុខដុមរមនា​ក្នុងសន្តិភាព ក្រោមដំបូលរដ្ឋធម្មនុញ្ញតែមួយ ​បន្តយកអស់កម្លាំងកាយ កម្លាំងចិត្ត និងបញ្ញាស្មារតីដើម្បីកសាង និងការពារមាតុភូមិរបស់ខ្លួន។

ឯកឧត្តម បានលើកឡើងថា ក្រោមការដឹកនាំរបស់សម្តេចនាយករដ្ឋមន្ត្រីបច្ចុប្បន្ន បានការពារយ៉ាង​រឹងមាំនូវសន្តិភាព ដោយសម្រេចបានសមិទ្ធផលថ្មីៗជាច្រើន រួមមាន៖ ផ្លូវ ស្ពាន ប្រព័ន្ធធារាសាស្ត្រ អគ្គិសនី ប្រព័ន្ធព័ត៌មាន រោងចក្រ វត្តអារាម សាលារៀន និងមន្ទីរពេទ្យ។ល។ ទាំងនៅទីក្រុង ទាំងនៅជនបទ និងតំបន់ព្រំដែន។

ឯកឧត្តម បន្ថែមថា សន្តិភាព និងសមិទ្ធផលទាំងនេះ បានមកពីការយកអាយុជីវិតធ្វើជាដើមទុន និងពលិកម្មដ៏ធំធេងរបស់សមាជិក ​សមាជិកាគណបក្សប្រជាជនកម្ពុជា ហេតុនេះ យើងចងចាំ​ជានិច្ចនូវ​គុណូបការៈដ៏ថ្លៃថ្លានេះ និងប្តេជ្ញាថែរក្សារាល់សមិទ្ធផលទាំងនេះឱ្យ​បានគង់វង្ស​ជារៀង​ដរាប ព្រមទាំងបន្តកសាងប្រទេសជាតិឱ្យកាន់តែរីកចម្រើនបន្ថែមទៀត តាម​រយៈការបោះឆ្នោត​គាំទ្រ​គណបក្សប្រជាជនកម្ពុជា។

ឯកឧត្តម បានធ្វើការផ្សព្វផ្សាយអំពីកម្មវិធីនយោបាយរបស់គណបក្សប្រជាជនកម្ពុជាទាំង ​៧ចំណុច និងការដាក់ចេញនូវកម្មវិធីគោលនយោបាយជាអាទិភាពចំនួន​ ៧ចំណុច ក្នុងកម្មវិធីនយោបាយ​របស់រាជរដ្ឋាភិបាលនីតិកាលទី៧ នៃរដ្ឋសភា ដែលត្រូវបានប្រកាសឡើងដោយសម្ដេចតេជោ ហ៊ុន សែន ប្រធានគណបក្សប្រជាជនកម្ពុជា កាលពីថ្ងៃទី១ ខែកក្កដាកន្លងទៅថ្មីៗនេះ៕