ភ្នំពេញ៖ នៅព្រឹកថ្ងៃទី៣ ខែកក្តដានេះ ឯកឧត្តម អ៊ុច បូរិទ្ធ រដ្ឋមន្ត្រី ប្រតិភូមិអមនាយករដ្ឋមន្ត្រី និងជា រដ្ឋលេខាធិការក្រសួងការបរទេស និងកិច្ចសហប្រតិបត្តិការអន្តរជាតិ បានអញ្ជើញបើកវគ្គសិក្សា​ភាសាបារាំង​ចំនួន២ឆ្នាំជូនកម្លាំងទ័ពមួកខៀវភាគច្រើនជានារី ​ដើម្បីបង្កើនសមាសភាពនារី បញ្ជូនចូលរួមថែរក្សាសន្តិភាពអង្គការសហប្រជាជាតិ UN ​នៅតាមបណ្តាប្រទេសកំពុងមានជម្លោះ សង្គ្រាម។

ឯកឧត្តម អ៊ុច បូរិទ្ធ ថ្លែងថា វគ្គសិក្សាបំប៉នភាសាបារាំង ដែលឧបត្ថម្ភដោយអង្គការអន្តរជាតិ​និយាយភាសាបារាំងOIF រយៈពេល២ឆ្នាំ គឺមានគោលដៅសំខាន់ចង់បង្កើនសមាសភាពកម្លាំង​មួកខៀវនារី ​ចូលប្រតិបត្តិការថែរក្សាសន្តិភាពUNឲ្យបាន៥០% នៅគ្រប់តំបន់បេសកកម្មUN ពិសេស​តាមបណ្តាប្រទេសនិយាយភាសាបារាំង ដូចជា សាធារណរដ្ឋម៉ាលី និង អាហ្វ្រិក​កណ្តាលជាដើម។

បើតាម ឯកឧត្តម ជេក ប៉េឡេត ( Jacque Pellet) ឯកអគ្គរដ្ឋទូតបារាំង ប្រចាំនៅកម្ពុជា និងតំណាង អង្គការអន្តរជាតិនិយាយភាសាបារាំង OIF បានប្តេជ្ញាចិត្តថា នឹងបង្កើនការបណ្តុះបណ្តាល​ភាសាបារាំង ​ជូនទ័ពមួកខៀវកម្ពុជា ​ជាពិសេស ​ទ័ពមួកខៀវជានារី ​ឲ្យបានច្រើនបំផុត ដើម្បី​ជំរុញបង្កើនចំនួនស្ត្រីទ័ពមួកខៀវកម្ពុជា បញ្ជូនទៅបំពេញបេសកកម្មរក្សាសន្តិភាពអង្គការ​សហប្រជាជាតិឲ្យបានច្រើនបំផុត។

ឯកឧត្តម បោង បុន្នី អគ្គនាយករងមជ្ឈមណ្ឌលជាតិរក្សាសន្តិភាព ថ្លែងថា ​គិតចាប់ពីឆ្នាំ២០០៩ រហូតដល់​បច្ចុប្បន្ន ភាគីបារាំងបានឧបត្ថម្ភគាំទ្រវគ្គហ្វឹកហ្វឺនទាំងក្នុង ​និងក្រៅប្រទេសសរុបចំនួន ៨៤វគ្គ ដល់សិក្ខាកាមសរុបចំនួន ១៨៥០នាក់ ហើយសិក្ខាកាមទាំងអស់សុទ្ធសឹងតែទទួលបាន​ឱកាស​ចូលរួមបេសកកម្មទាំងក្នុងកង និងជាទាហានសេនាធិការ ​និងសង្កេតការណ៍យោធាផងដែរ។

សូមបញ្ជាក់ថា ​ចាប់តាំងពីឆ្នាំ២០០៦ មកដល់ បច្ចុប្បន្ន ​មជ្ឈមណ្ឌលជាតិ បានបញ្ជូនកម្លាំងមួកខៀវ​ក​ម្ពុជា​សរុបចំនួន ៩១៩៥នាក់ ក្នុងនោះនារី៧២២នាក់ ​ទៅកាន់ ៩ប្រទេស ហើយត្រូវបានប្រើប្រាស់​ពីរភាសាជាគោល ​គឺភាសាអង់គ្លេស និងភាសាបារាំង៕អត្ថបទ ស៊ុម សុខជា